Был матур байрам ауылдың имам-хатибы Мәғҙән Атнабаевтың тырышлығы менән даими уҙғарыла. Йыйынға йыл да республика райондарынан ғына түгел, Өфө, Ҡазан ҡалаларынан, Пермь крайынан бихисап ҡунаҡ килә. Араларында дин белгестәре, ғалимдар ҙа күп була. Һәр сара бай йөкмәткеле булыуы менән иҫтә ҡала.
Быйылғы байрам да асыҡ һауала, данлыҡлы Ғарифулла хәҙрәт Кейеков шишмәһе янында уҙҙы. Ҡөрьән уҡылып, доға ҡылынғас, мосолман ҡәрҙәштәребеҙ тарихты байҡаны, Ғәле Соҡорой, Ғарифулла Кейеков кеүек олуғ шәхестәребеҙҙең тормош юлына, эшмәкәрлегенә күҙ һалды. Ғилем-мәғрифәт өлкәһендә күпме хеҙмәт, рухи-әхлаҡи мираҫ ҡалдырған улар!
Күренекле ғалим, олуғ тәрбиәсе Ғарифулла хәҙрәт барлыҡ ғүмерен халҡына, Ислам динен үҫтереүгә бағышлаған. Хәләл аҡсаһына мәсет, мәҙрәсә төҙөтөүе менән дә ҙур ихтирамға лайыҡ шәхес ул. Хәҙрәт балалар уҡытҡан, имамдар әҙерләгән, етемдәр, мохтаждар өсөн ҡунаҡхана, ашхана ла төҙөткән. Ғәле Соҡорой нәҫеленән булған иманлы ҡәрҙәшебеҙ халыҡҡа һүҙ генә түгел, ә шәхси ғәмәлдәре аша ла тәрбиә биргән. Пәйғәмбәребеҙ Мөхәммәт ғәләйһис-сәләм кеүек һәр эште үҙе башҡарып күрһәтер булған Ғарифулла хәҙрәт. Халыҡты хеҙмәт һөйөргә өйрәткән, телде, мәҙәниәтте һаҡларға әйҙәгән, көнкүреш шарттарын яҡшыртырға тырышҡан. Ғөмүмән, төбәк халҡы Ғәле Соҡорой йәшәгән замандан уҡ иман нурына ҡойоноп ғүмер иткән, әҙәпле-әхлаҡлы булған. Бында, әлбиттә, руханиҙарыбыҙҙың өлөшө баһалап бөткөһөҙ.
Әл-хәмдү лил-ләһ, Тәтешле халҡының тырышлығы, хеҙмәт һөйөүсәнлеге, берҙәмлеге бөгөн дә күптәргә өлгө булырлыҡ. Айырып шуны ла әйтергә кәрәк: районда фермалар теүәл, техника үҙ урынында – иманлы етәкселәр заманында күмәк хужалыҡтарҙы һаҡлап ҡалыуға күп көс һалған. Һуңғы тиҫтә йыл дауамында ҡайһы бер райондарҙа ауыл хужалығы продукцияһын етештереү эше бик ныҡ аҡһаһа, Тәтешлелә, киреһенсә, күрһәткес элеккегә ҡарағанда ла яҡшыраҡ. Мал һаны икеләтә артҡан, баҫыуҙарҙың һөрөлмәй, сәселмәй ҡалған бер сутый ере лә юҡ. Ҡайһы бер төбәктәрҙәге сүп үләне, шырлыҡ баҫҡан игенлектәрҙе күрәһең дә тәтешлеләрҙең үҙ еренә ни ҡәҙәр ихтирамлы, уңған, рухлы булыуына тағы ла бер тапҡыр һоҡланып, улар менән ғорурланып ҡуяһың. Уңыш үҙенән-үҙе килмәй, ҙур тырышлыҡ аша яулана. Элек-электән иманлы, тәрбиәле, хеҙмәтенән йәм һәм тәм тапҡан халыҡ ғүмер итә шул бында! Район хакимиәте башлығы Рушан Гәрәев тә, ата-баба тәрбиәһенә тоғро ҡалып, халыҡты иғтибарынан айырмай, уның көнитмешен яҡшыртыу маҡсаты менән эшләй. Элеккесә, хеҙмәт кешеһе иң ҙур хөрмәт тойоп йәшәй Тәтешлелә.
Районда, әл-хәмдү лил-ләһ, әле 30-ҙан ашыу иман йорто уңышлы эшләй. Уларға ғилемле, тәжрибәле, халыҡ араһында ҙур хөрмәт ҡаҙанған имамдар етәкселек итә.
Тәтешлеләрҙең киләсәктә лә имен тормошта, иманға ҡойоноп йәшәүен теләйем.