Ул егерменән ашыу кешене эш урыны менән тәьмин иткән, ағас ҡырҡыусы егеттәрҙән бик дәртле, берҙәм коллектив туплаған. Улар районда ағас, утын әҙерләй. Пилорамала таҡта ярҙыралар, рәшәткә, бурса һәм башҡа хужалыҡ кәрәк-ярағы етештерәләр. Әйткәндәй, Фәнүз Ғәйнан улы үҙенең һөйөклө ҡатыны Зөһрә еңгәнең тыуған ауылы Һәйтәктә бынамын тигән иман йорто – ҙур мәсет – төҙөттө.
Алма ағасынан йыраҡ төшмәй, тиҙәр. Матур ғаиләнең йолаһын дауам итеп, Йәғәфәровтарҙың 28 йәшлек Азат исемле улдары Учалы ауылында үҙ эшен асҡан. Уның “Нева” йәмғиәте ағас күмере әҙерләү менән шөғөлләнә. Әҙер продукцияны улар, ҙур тоҡтарға тултырып, “Русский алюминий” компанияһына оҙата. Әлбиттә, күмерҙең сифаты бик юғары булырға тейеш, сөнки ул төҫлө металл әҙерләү цехтарында ҡулланыла.
— Беҙ компанияға ай һайын 500–600 кубометр күмер ебәреп торабыҙ. Уның дымлылығы һәм химик составы талап ителгәнгә тап килергә тейеш. Шуға ла эште еренә еткереп, сифатлы башҡарыу зарур, — тине йәш эшҡыуар Азат Йәғәфәров.
Тәүҙә ҡыҫҡа ғына итеп бысылған, ярылған ҡайын утындарын ҙур тимер күнәктәргә – реторттарға – тултыралар. Улар тығыҙыраҡ булған һайын, күмерҙең дә сифаты юғарыраҡ. Йәш кешенең шундай ғәҙәти булмаған технологик йәһәттән ҡатмарлы эшкә тотоноуы — үҙе бер ҡыуаныслы ваҡиға.
Фәнүз Азаттың уңыштары менән ғорурлана, сөнки ул үҙенең ун алты ауылдашына һәйбәт кенә хеҙмәт хаҡы түләнгән даими эш булдырған. Етмәһә, кинйә улы Айнур ҙа йәйгеһен ағаһы Азатҡа эшкә яллана. Уның төп бурысы — реторттарға утын тултырыу. Физик көс талап иткән шөғөл булһа ла, Айнур каникулда үҙенә һәйбәт кенә аҡса эшләп ала.
Яңыраҡ Учалы районына Мәскәү ҡалаһының бер ҙур фармацевтика фирмаһынан вәкилдәр килеп, “Нева” йәмғиәте сығарған күмер менән ҡыҙыҡһынған. Билдәле булыуынса, был продукцияны медицина өлкәһендә лә ҡулланалар.
Тимәк, Азат Фәнүз улына киләсәктә яңы офоҡтар асылыуын, уның арымай-талмай яңынан-яңы үрҙәр яулауын теләргә ҡала. Учалымдың алтын ҡуллы кешеһенә, йәғни Фәнүз Йәғәфәровҡа арнап ошо юлдарҙы яҙғайным.
Ҡояш кеүек кешеләр бар,
Тик ҡояш юғарыла.
Ә һин халыҡ араһында —
Нур сәсәң Учалыла.
Ошо нурҙар киңәйтәләр
Дүрт тарафта офоҡто.
Һәйтәктәргә мәсет төҙөп,
Ҡыуандырҙың халыҡты!
Һин сәмле лә, егәрле лә,
Эшле иттең күптәрҙе.
Ил ағаһы тип атайҙар
Тап һинең кеүектәрҙе!
Алтын кешеләр булғанда,
Ни кәрәге алтындың?!
...Арҡа терәр ағайҙар бар,
Таянысы халҡымдың!