“Һаулыҡ” милли проекты бойомға ашырыла башлағандан алып илдә медицина хеҙмәтенең сифаты бермә-бер яҡшырған – 2006 йылдан бирле Рәсәй халҡының ғүмере яҡынса дүрт йылға оҙайған. Милли медицина палатаһы президенты, күренекле хирург Леонид Рошаль фекеренсә, ыңғай үҙгәреште һаҡлау өсөн медицина ҡорамалдарын яҡшыртыу ғына етмәй. “Тәү сиратта медицина ярҙамы сифатлы һәм һәр кем файҙалана алырлыҡ булырға тейеш”, – тине ул Башҡортостандың һаулыҡ һаҡлау хеҙмәткәрҙәре менән уҙғарылған осрашыуҙа.
“Милли медицина палатаһы” коммерцияға ҡарамаған партнерлығы 2010 йылда ойошторола. Маҡсаты – Рәсәйҙең һаулыҡ һаҡлау системаһын камиллаштырыуға булышлыҡ итеү. Палатаның ошо йүнәлештәге тәҡдимдәре Бөтә Рәсәй халыҡ фронтының “Сәләмәт милләт” программаһына индерелгән. Осрашыуҙа Леонид Рошаль документтағы мөһим пункттарға, һаулыҡ һаҡлау өлкәһендәге айырым мәсьәләләргә туҡталды.
– Яңыраҡ мәрмәр таштар менән биҙәлгән мөһабәт дауахананан оло йәштәге бер ҡатын һуҡранып килеп сыҡты. “Окулисҡа күренер өсөн өс сәғәт көтөргә ҡуштылар”, – тине ул. Теркәү бүлегенә барып, хәлде аңлатып биреүҙәрен һораным, әммә аныҡ яуап булманы. Дауаханала сиратта тороу – 20, ҡалаларҙа “ашығыс ярҙам”дың килеүе – 15 минуттан, операцияны көтөү бер айҙан да ашырға тейеш түгел. Дәүләт кимәлендә ошондай бурыстар ҡуйылһа, халыҡҡа медицина ярҙамын күрһәтеү яҡшырасаҡ, – тине Леонид Михайлович һәм табиптарҙы пациенттарға ихтирамлы, иғтибарлы булырға саҡырҙы.
Милли медицина палатаһы президенты “Рәсәй Федерацияһы граждандары һаулығын һаҡлау нигеҙҙәре тураһында”ғы Федераль закондың ҡайһы бер өлөштәре менән килешеп етмәүен белдерҙе.
– Әгәр минән генә торһа, уны үҙгәртеп яҙыр инем. Закон киләсәктә камиллашырға тейеш. Ҡайһы хеҙмәттең түләүле, ҡайһыһының бушлай икәнлеге әбей-бабайҙарға түгел, миңә лә аңлашылып етмәй. Дауахана — бөҙрәхана түгел, унда һәр яҡлап та ныҡлы тәртиптән тыш, яуаплылыҡ тойғоһо көслө булырға тейеш, – тине Л. Рошаль.
“Сәләмәт милләт” программаһына ул шулай уҡ аҙ тәьмин ителгән ғаиләлә үҫеүсе балаларҙы 12 йәшкә тиклем бушлай дарыу менән тәьмин итеү, табиптарҙың хатаһы арҡаһында күрелгән зыян өсөн компенсация күләмен арттырыу, ауылдарҙа медицина пункттарын япмау буйынса тәҡдимдәр индергән.
Халыҡ сәләмәтлеге һағында тороусы Леонид Рошалдең ҡыйыу тәҡдимдәре Рәсәй Федерацияһы Хөкүмәтенең Премьер-министры иғтибарынан ситтә ҡалмай. Әлеге мәлдә Леонид Михайлович, Рәсәй президентлығына кандидат Владимир Путинға ярҙам итеү буйынса үҙәк халыҡ штабының мобиль төркөмө ағзаһы булараҡ, илдең табиптары менән ошондай осрашыуҙар уҙғара. Башҡа төбәктәрҙәге кеүек, Башҡортостандың медицина хеҙмәткәрҙәре лә ҡунаҡҡа һорауҙарын биреп ҡалырға ашыҡты. Конгресс-холда уҙған йәнле аралашыуҙа Дәүләт Думаһының һаулыҡ һаҡлау буйынса комитеты рәйесе урынбаҫары Сергей Дорофеев, Башҡортостан Хөкүмәте Премьер-министры урынбаҫары Фидус Ямалетдинов, Рәсәй президентлығына кандидат Владимир Путинға йәмәғәт ярҙамы күрһәтеү буйынса Башҡортостан Республикаһындағы Халыҡ штабы етәксеһе Альберт Мифтахов менән Башҡортостан һаулыҡ һаҡлау министрының беренсе урынбаҫары Әнүәр Бакиров та ҡатнашты.