Тәүге тапҡыр сығыш яһауына ҡарамаҫтан, кескәйҙәр баҙап ҡалманы, ғәжәп матур сығыш яһаны. Һамаҡлап һөйләүе, ҡумыҙ, ҡурай уйнауы, өзләүе менән тамашасыларҙың күңелен ныҡлы яулап алды улар.
Беренсе төркөмдә 34 бала ҡатнашты. Төп бүләккә "Аҡбуҙат" балалар баҡсаһынан Илшат Ғөбәйҙуллин лайыҡ булды. Уны конкурсҡа тәрбиәсеһе Гөлнара Йыһангирова әҙерләгән. Тырыш малай эпостың 97 юлын яттан һөйләне. Бында шулай уҡ Динә Исҡужина ("Аҡбуҙат" балалар баҡсаһынан), Гөлсиә Әминева ("Әкиәт"тән), Ғәфүр Таштимеров ("Ҡояшҡай"ҙан), Әҙилә Хоҙайбирҙина ("Аҡбуҙат"тан), Илмира Йылҡыбаева ("Ҡайынҡай"ҙан) кеүектәрҙең сығыштары юғары баһаланды.
Икенсе төркөмдә 18 башланғыс класс уҡыусыһы сәсәнлектә көс һынашты. Думбыра, ҡумыҙ һәм ҡурай уйнап, улар сығышын тағы ла йәмләп, көсәйтеп ебәрҙе. Бәйгеселәр араһынан 9-сы лицейҙан Тимур Байрамғоловҡа тиңләшеүсе булманы. Үҙенсәлекле бер сығыш хаҡында ла әйтеп үтмәү мөмкин түгел: Сибай махсус музыка колледжы филиалында уҡыған Камилә Аралбаева эпостың 252 юлын ятлаған!
Ғөмүмән, бәләкәстәр оҫталығы, бәйгегә әҙерлекле килеүе менән һоҡландырҙы. Йәш сәсәндәр эпосты ятлап ҡына ҡалмаған, ә төрлө музыка ҡоралында уйнарға өйрәнгән, уларға сығыш яһау өсөн махсус кейем дә тектерелгән. Был, әлбиттә, уҡытыусыларының, тәрбиәселәренең тырышлығы, эшкә етди ҡарауы тураһында һөйләй.
Конкурста өлкән класс уҡыусылары ла уңышлы сығыш яһаны, беренсе урынды "Ирәндек" лицейынан Ләйсән Ғибәҙуллина һәм гимназиянан Нәсимә Сараева яуланы. Һөҙөмтәлә жюри ағзалары, "Урал батыр" эпосын башҡарған йәш сәсәндәрҙең Бөрйән районында үтәсәк республика бәйгеһендә Сибайҙың намыҫын 9-сы лицей уҡыусылары яҡлаһын, тигән фекергә килде.
Әйткәндәй, конкурсты ойоштороуҙа ағинәйҙәр ҙә әүҙем ҡатнашты: ҡала кимәлендә мәшһүр әҫәргә арналған аҙналыҡ иғлан итеп, студенттар һәм мәктәп уҡыусылары араһында уны урыҫса һәм башҡа сит телдәрҙә һөйләүселәр араһында ярыш уҙғарҙы.




Асия СОЛТАНОВА, жюри рәйесе, сәсәниә:
— Мәктәпкәсә йәштәге балаларҙың сығышы ифрат шәп булды. Уларҙы ярышҡа әҙерләгән тәрбиәселәргә ҙур рәхмәт! Ғөмүмән, ҡалала сәсәндәр мәктәбе уңышлы эшләй. Бында, әлбиттә, төрлө тармаҡта хеҙмәт иткән милләттәштәребеҙҙең, ата-әсәнең өлөшө ҙур. "Сәсәне бар халыҡ йәшәр" тигән мәҡәл бар: ҡала сәхнәһендә "Урал батыр" эпосын ихлас күңелдән һөйләүселәр бар икән, тимәк, тамырҙарыбыҙҙың ныҡлығына ҙур ышаныс менән, киләсәгебеҙ өсөн яуаплылыҡ тойоп, артабан атларға, яңы үрҙәргә ынтылырға бурыслыбыҙ.

Айһылыу Моталлапова, ҡала хакимиәтенең мәғариф идаралығы методисы:
— Йыл һайын уҙғарылған бәйгелә һәр саҡ яңынан-яңы исемдәр асабыҙ, үҙенсәлекле таланттарға юлығабыҙ. Уҡыусыларыбыҙ республика кимәлендә үткән конкурста ла әүҙем ҡатнаша, призлы урындар яулай. Быйыл да еңеүселәр араһында сибайҙар булыр тигән ышаныстабыҙ. Ҡалала яҡшы һөҙөмтәгә өлгәшкәндәрҙе һайлап алып, конкурсҡа әҙерлекте башланыҡ та инде.