– Бына икмәк үҫтерәбеҙ тип тырышып йөрөгән мәл. – Эҫе ҡояш аҫтында сәсеү эштәре менән мәж килгән егеттәрҙең йөҙөндә арығанлыҡ тойолһа ла, ихлас, алсаҡ булып сыҡтылар.
Бөрйәндекеләр икән.
– Исламбайҙан булам, – тине үҙен Илнур Ғәлиуллин тип таныштырғаны.
– Мин – Аҫҡарҙан, Дауыт Ғәбиҙуллин, – тине уның иптәше.
– Бында күсеп килдегеҙме әллә?
– Юҡсы, “Уңыш”тың директоры Айҙар ағай саҡырҙы.
Шул мәл баҫыу ситенә “Джонгир” килеп туҡтаны. Егеттәр, ғәфү итегеҙ, тигәндәй беҙгә ҡараны ла “тимер ат”тарын ҡабыҙып, тракторға яҡынлашты. Улар агрегатҡа ашлама, орлоҡ тултырған арала “Джонгир”ҙың хужаһы менән таныштыҡ.
Ғәзинур Шәрипов тигән уҙаман икән. Бына 35 йыл сәсеүҙә ҡатнаша. Сығышы менән Стәрлебаш районының Тәтер-Арыҫлан ауылынан. Баҡһаң, уны “Ергән” МТС-ынан саҡырғандар. Әле баҫыуҙа бойҙай сәсеүҙәре.
Ул арала аҡсарлаҡ кеүек ап-аҡ машина беҙҙең янға кәйҙертеп килеп етте. Кабинанан урта йәштәрҙәге, йөҙөнән үк үҙ-үҙенә ышаныс һыҙаттары сағылған һомғол уҙаман сыҡты.
– “Уңыш”тың директоры Айҙар Тимерәшев булам, – тип ҡул һуҙҙы ул. – Егеттәр шәп, ышаныслы. Ҡулдарынан килмәгән эш юҡ. Кәрәк икән, тракторға ултыралар, мохтажлыҡ сыҡһа, йәһәт кенә машинаға күсәләр.
“Уңыш” бөгөн республикала сусҡа аҫраған берҙән-бер хужалыҡ тиерлек. Һәр яҡлап таҙа ит етештерә улар. Күптән түгел “Роспотребнадзор” хеҙмәткәрҙәре етди тикшереү үткәреп, был йәһәттән сифатлы тип баһалаған.
– Малсылыҡ һәм ит продукттары етештереү менән шөғөлләнәбеҙ, – тип үҙҙәренең эшмәкәрлеге хаҡында һөйләне етәксе. – 800 баш сусҡа аҫрайбыҙ. Үҙебеҙҙең малға етерлек иген, бесән үҫтерәбеҙ. Әллә ни ҙур булмаған цех бар, колбаса етештерәбеҙ, ит ыҫлайбыҙ. Бер ниндәй ҙә химик матдәләр ҡулланмайбыҙ. Шуға ла беҙҙең тауарҙы баҙарҙа сират тороп алалар.
Айҙар Әмир улы һуңғы осорҙа үҙебеҙҙең етештереүселәргә юл асылғанына ҡыуанып бөтә алманы:
– Бөтә донъя сауҙа ойошмаһына инеү тамам хәлдән алғайны. Шуға йыл ярым самаһы малсылар бушҡа тигәндәй эшләне. Һөҙөмтәлә хужалыҡтарҙа мал кәмене. Һуңғы ваҡыттағы ваҡиғалар киләсәккә ниндәйҙер өмөт уятты, һатасаҡ иткә хаҡ артты, күҙ асылып ҡалды тигәндәй. Ә сәсеүҙе ун биш көндә тамамларбыҙ, тип торабыҙ. Яғыулыҡ материалдары, орлоҡ, ашлама етерлек.
Торатау итәгендә танышҡан ихлас баҫыу уңғандары менән хушлашып, юлыбыҙҙы дауам иттек. Ялан эшсәндәренән бөркөлөп торған ҡеүәт беҙгә лә күскәндәй булды. Тап шундай ир-аттар ғына бөгөн ерҙә эшләй алалыр ул.