Ошо көндәрҙә Нефтекама ҡала хакимиәте биш етем ҡыҙ менән егеткә оло һөйөнөс бүләк итте: уларға күп ҡатлы өр-яңы йорттан фатир асҡыстары тапшырылды. Был ваҡиға – етем һәм ата-әсә ҡарауынан мәхрүм балаларҙы торлаҡ менән бушлай тәьмин итеүҙе күҙ уңында тотҡан республика программаһын уңышлы тормошҡа ашырыуҙың бер миҫалы.
Ҡаланың ҡарағай урман буйындағы яңы биҫтәһендә ҡалҡып сыҡҡан туғыҙ ҡатлы йортта эш бөгөн дә дәррәү дауам итә. “Башҡортостан Республикаһының социаль торлаҡ төҙөлөшө фонды” заказы буйынса уға былтыр августа нигеҙ һалған “Нефтекамскстройзаказчик” муниципаль төҙөлөш ойошмаһы 135 фатирлы торлаҡты йәй аҙағына тулыһынса сафҡа индерергә ниәтләй. Әлегә бер подъездағы етмеш ике фатир үҙ хужаларын ҡаршылай. Уларҙың барыһы ла, социаль программаларға ярашлы, торлаҡ шарттарын яҡшыртыуға мохтаж: күп балалы ғаиләләр, зәғиф бала тәрбиәләгән ата-әсәләр, инвалидтар, бюджет хеҙмәткәрҙәре. Тантаналы шарттарҙа ҡала етәкселәре ҡулынан асҡыс алған етемдәр менән бер рәттән, улар ҙа оҙаҡламай өй туйлаясаҡ.
Фатирҙар бөгөндән күсенеп йәшәрлек хәлдә, яңы тормош башлау өсөн барыһы ла әҙер. Төҙөүселәрҙең эшенә ҡәнәғәтһеҙлек белдерергә урын да юҡ: заманса ишектәр, пластик тәҙрәләр, матур линолеум, зауыҡлы обойҙар...
– Һеҙ ҡаланың бик йәмле төбәгендә урынлашҡан яҡшы йорттан фатир алдығыҙ, — тине, уларҙы ҡотлап, ҡала хакимиәте башлығы Рәшит Дәүләтов. – Өйөгөҙ һәр саҡ яҡты, йылы булһын, балаларҙың күңелле тауышы тынмаһын.
Матур теләктәр үҙ ғүмерендә тәүге фатирын алған Элина Сайтаеваның күңеленә хуш килде. Ике бала тәрбиәләгән ғаилә ҡайны менән ҡәйнәһе фатирында көн күрергә мәжбүр булған. Апай булараҡ, ул бер туғаны Людмиланы ла үҙ ҡанаты аҫтына һыйындырған. Бөгөндән һеңлеһенең дә үҙ фатиры булды. Сайтаевалар бик иртә ата-әсәһеҙ ҡалған, икеһе лә 59-сы һөнәрселек лицейын тамамлаған, Элина – контроль-иҫәп приборҙары һәм автоматтар көйләүсе, һеңлеһе – ашнаҡсы-кондитер.
Электрик һөнәрен үҙләштергән Сергей Ергунов — Нефтекама район-ара электр селтәре предприятиеһында, киң профилле станоксы Рөстәм Эгамов “Сталькомплект” фирмаһында эшләй. Егеттәр хәҙер ғаилә ҡороу тураһында ныҡлап уйлаясаҡтарын белдерҙе.



Рәшит Дәүләтов, Нефтекама ҡалаһы хакимиәте башлығы:
– “Башҡортостан Республикаһының социаль торлаҡ төҙөлөшө фонды” ҡатнашлығында ҡырҡ фатирлы тәүге социаль йортто бер йыл элек сафҡа индергәйнек. Фатирҙарҙың дүртәүһе балалар йорттарында тәрбиәләнгән етемдәргә бирелде, ҡалғандарына аҙ тәьмин ителгән күп балалы һәм йәш ғаиләләр, бюджет хеҙмәткәрҙәре эйә булды. Үҙебеҙҙең “Нефтекамскстройзаказчик” төҙөлөш ойошмаһы тәүге йортто яҡшы сифатлы итеп файҙаланыуға тапшырғандан һуң икенсеһенә тотондо. 135 фатирҙың етмеш икеһе әҙер ҙә инде. Шуларҙың бишәүһен етемдәргә бирҙек, йорт тулыһынса сафҡа ингәс, тағы ла дүрт үҫмер өйлө буласаҡ. Ҡала буйынса бөгөн 98 етем фатирға сиратта тора. Уларҙы торлаҡлы итеү социаль программа нигеҙендә киләсәктә тормошҡа ашырыласаҡ. Асҡыс алыусыларҙы ихлас ҡотлап, уларға именлек һәм үҙ фатирҙарына ысын хужа булыуҙарын теләйем.