Ниһайәт, былтыр мәсьәлә етди иғтибарға алынып, ауыл халҡының күптән көткән хыялы тормошҡа ашты — Ләмәз йылғаһы аша һалынған аҫылмалы күпер сафҡа инде. Уны Өфө ҡалаһының “Аҫылмалы күпер” яуаплылығы сикләнгән йәмғиәт эшселәре төҙөнө.
— Яңы, ышаныслы күпер ләмәздәрҙең яҡты хыялы ине. Бөгөн ошо ҡыуаныслы ваҡиғаның шаһитыбыҙ, — тип башланы һүҙен, тантананы асып, район хакимиәте башлығы Александр Комзалов. – Үрге Ләмәз ауылы — Архангел районының иң матур төбәктәренең береһе. Бындағы урман-тауҙар күптәрҙе һоҡландыра. Ауылда 38 йортта 105 кеше йәшәй, башланғыс мәктәп, фельдшер-акушерлыҡ пункты, клуб, китапхана, мәсет, магазин бар. Тырыш, уңған халыҡ умартасылыҡ менән шөғөлләнә, йылҡы үрсетә. Ауыл барлыҡҡа килгәндән бирле транспорт мәсьәләһе киҫкен торҙо. Ләмәз йылғаһы ярынан сыҡҡан мәлдәрҙә уны “ҙур ер” менән иҫке күпер генә тоташтырҙы. Ваҡытында медицина ярҙамы килеп етә алманы, аҙыҡ-түлек ташыу мәшәҡәт тыуҙырҙы.
Социаль объекттар төҙөү, халыҡтың көнкүрешен яҡшыртыу республика Хөкүмәте, урындағы үҙидара органдары эшмәкәрлегенең мөһим йүнәлештәре булып тора. Быйыл районыбыҙҙа социаль йүнәлешле бер нисә объект файҙаланыуға тапшырылды ла инде: торлаҡ шарттарын яҡшыртыуға мохтаждар өсөн күп фатирлы йорт төҙөлдө, Ырныҡшы ауылында (13 километр 95 метр), Абҙан һәм Ырныҡшы ауылдары араһына (9 километр) газ үткәргес һуҙылды.
2013 йылдың апрелендә “Президент менән һөйләшеү” телепроекты барышында урындағы халыҡ Ләмәз йылғаһы аша күпер төҙөү мәсьәләһе менән мөрәжәғәт итте. Рөстәм Зәки улы Хәмитов мәсьәләне ыңғай хәл итеү маҡсатында республика Хөкүмәтенә һәм район хакимиәтенә ошо транспорт объектын төҙөргә бойорҙо. Бер йыл үтеүгә һөҙөмтәне күрәбеҙ: күпер аша йәйәүлеләргә лә, автомобилдәргә лә хәүефһеҙ йөрөргә мөмкин. Белеүебеҙсә, бында Башҡортостандың йәмле урындарының береһе – Атыш шарлауығы урынлашҡан. Бындай уңайлыҡтар булдырылғандан һуң, мөғжизәле байлығыбыҙҙы күрергә теләгәндәр ағымы бермә-бер артасаҡ, — тине ул.
Артабан ләмәздәрҙе ҡотлар өсөн килгән ҡунаҡтар һүҙ алды.
— Был — республика кимәлендәге байрам, бик шатлыҡлы ваҡиға. Күпер һеҙҙең көнитмешегеҙгә яңы һулыш өрөр, туризмды үҫтерергә булышыр. Уның ҡәҙерен белегеҙ, һаҡлағыҙ, — тине Башҡортостан Президенты Хакимиәтенең Территориялар менән эшләү һәм кадрҙар сәйәсәте идаралығы начальнигы урынбаҫары Рәмил Хәлилов.
“Аҫылмалы күпер” йәмғиәте етәксеһе Фәнил Дәүләтшин башҡарылған хеҙмәт, күперҙең үҙенсәлектәре тураһында һөйләне. Ауыл биләмәһе башлығы Борис Иванов уның киләсәктә кешеләр тормошона, эшҡыуарлыҡты үҫтереүгә ыңғай тәьҫир итәсәгенә ышаныс белдерҙе.
Йәйәүлеләр һәм транспорт хәрәкәте өсөн тәғәйенләнгән яңы күпер алты тоннаға тиклем ауырлыҡ күтәреүгә иҫәпләнгән. Хәҙер “Тиҙ ярҙам” машиналары, мәктәп уҡыусыларын йөрөткән автобустар ауылға ҡаршылыҡһыҙ инә аласаҡ.
— Бынан ары беҙгә көслө ташҡын хәүеф тыуҙырмаясаҡ. Ул ғына ла түгел, был күпер ауылыбыҙҙың йәме лә, — тип шатлана ләмәздәр.


Хәлимә МОТАЛЛАПОВА, уҡытыусы:
— Ошо ауылға уҡытырға ебәргән саҡта, бер йылдан күпер булыр, тип вәғәҙә биргәйнеләр. Шунан бирле 49 йыл уҙҙы. Ауыл өсөн ҙур ҡыуаныс был. Юғиһә ғүмер буйы ҡайҙа кәмә, ҡайҙа оҙон ҡуныслы итектә кисеп йөрөнөк бит. Ауырлыҡтар артта ҡалыр инде.

Зоя АГИШЕВА, пенсионер:
— Бабай менән икәү генә йәшәйбеҙ, балалар ситкә китеп бөттө. Ялға ҡайтҡандарында күп михнәт күрә торғайнылар. Һыу ташҡанда, йылға буйына килеп етә алмай, был яҡ ярға сыға алмай ыҙаландылар. Уларға хәҙер бер ҡыйынлыҡһыҙ ҡайтырға була. Шуға һөйөнәбеҙ.