Тыуған яғың тәбиғәте дәрт өҫтәп ебәрер
Иң тәүҙә, әлбиттә, кабинетта һәр нәмәне дөрөҫ урынлаштырыу мөһим. Беренсенән, эш өҫтәлеңде ишек эргәһенә ҡуйырға ярамай. Унда үҙеңде һаҡланған итеп тоймаясаҡһың, айырыуса кеше инеп-сығып йөрөгән ергә артың менән ултырһаң. Әгәр ҙә инде кабинет бәләкәй һәм өҫтәлде башҡа урынға ҡуйыу мөмкинлеге юҡ икән, ишек яғына ҡарап ултырырға тырыш. Башҡаларҙың иғтибарын йәлеп итеү өсөн уға гөлләмәле ваза йә иһә сағыу статуэтка ҡуйырға мөмкин.
Өҫтәлде ҙур тәҙрәнең янына ҡуйыу ҙа уңайһыҙлыҡ тыуҙыра: ниндәйҙер хәүеф, ҡурҡыу тойғоһо ғазаплауы ихтимал. Өҫтәүенә тыштағы күренеш иғтибарҙы томалай, фекер төйнәргә ҡамасаулай. Шуның өсөн тәҙрәне ҡорған йә жалюзи менән ҡаплау тәҡдим ителә.
Буш стеналар ҙа кәйефкә ыңғай тәьҫир итмәй, эшеңдең "буш" булырын юрай кеүек. Тимәк, күңелгә оҡшаған күренеште сағылдырған картиналар элеү отошло. Мәҫәлән, тыуған яғыңдың гүзәллеген хәтерләткән һүрәт эшеңә яңы дәрт-дарман өҫтәмәй ҡалмаҫ. Шул уҡ ваҡытта өҫтәлеңә туғандарыңдың, балаларыңдың фотоһүрәтен ҡуйыу ҙа ҡамасауламаҫ: улар кем өсөн хеҙмәт иткәнеңде, уңыштарың өсөн иң тәүҙә кем ҡыуанырын хәтерләтеп, күңелеңде күтәреп торор.
Кабинетта яҡтылыҡ һәйбәт булырға тейеш.
Һеҙҙең эш урынына кеше килмәй тормайҙыр: уларға уңайлылыҡ тыуҙырыу хаҡында ла уйларға кәрәк. Әйтәйек, бер нисә ултырғыс ҡуйыу мөһим: үҙе хаҡында хәстәрлек тойған ҡунаҡ менән һөйләшеү күпкә һөҙөмтәле булыр. Кабинетта таҙа һыу тотоу ҙа отошло: килгән кешенең эсергә һорауы ихтимал.

Кактус барҙа тыйнаҡ бул!
Бөгөнгө техника заманында эш бүлмәһен гөл менән биҙәү айырыуса киң таралған. Матур ҙа, һаулыҡ өсөн дә файҙалы. Йәшеллектең хеҙмәткәрҙәрҙең сәләмәтлегенә нисек тәьҫир итеүен ғалимдар оҙаҡ өйрәнгән. Тикшеренеүҙәр шуны күрһәткән: офиста үҫенте бар икән, эштәге мәсьәләләр тиҙерәк һәм һөҙөмтәлерәк хәл ителә, коллектив дуҫ, татыу була. Өҫтәүенә, хеҙмәткәрҙәр арыуға, баш ауыртыуына һирәгерәк зарлана икән.
Техника күплектән, офиста һауа ҡоро була. Дымландырыу өсөн ҡаҙаяҡ гөлө үҫтерергә тәҡдим ителә. Билдәле булыуынса, ул йылыны һәм тоноҡ яҡтылыҡты ярата. Шулай уҡ хлорофитум, сансевиерия гөлдәре файҙалы: тәүгеһе зарарлы матдәләрҙе юҡ итеп, һауаны таҙартһа, икенсеһе формальдегид молекулаларын бөтөрә. Икеһе лә һаулыҡҡа ыңғай йоғонто яһай, дауалау көсөнә эйә.
Компьютер алдында эшләгәндәргә драцена һәм финик пальмаһы ярҙамға килер. Ғөмүмән, эш өҫтәлендәге үҫентеләр күҙҙе ял иттерә. Япраҡтар, йәшел төҫтә булғанлыҡтан, иғтибарҙы йәлеп итмәй. Уларға ҡараһаң, фекер туплауы ла еңелерәк. Сәскәләр иһә, матурлығы, сағыу төҫө менән иғтибарҙы тотошлай ялмап алып, мәшәҡәттән аҙға ғына булһа ла ситкә китеп, мейене ял иттереп алыу мөмкинлеген бирә. Әммә үҫентеләрҙән ҡатмарлы композициялар яһарға ярамай, барыһы ла ябай булһын.
Компьютерҙың эргәһенә кактус гөлөн ҡуйыу ғәҙәтебеҙгә ингән. Ул техниканан килгән зарарлы матдәләрҙән һаҡлай, тибеҙ. Шул уҡ ваҡытта энәле үҫентене "ҡул аҫтында" тотоу сәйер ҙә кеүек. Әммә, ысынында, "уҫал" кактус өҫтәл янында тотанаҡлы, ипле ултырыуҙы, ҡулды болғап һөйләгәндә иғтибарлы булыуҙы, ҡағыҙҙарҙы, документтарҙы йыйнаҡ итеп һалыуҙы талап итеүсе лә.
Бүлмә гөлдәре кеше күңелен ҡәнәғәтлелек, аһәң менән тулыландыра, төшөнкөлөктән, көсөргәнештән арынырға ярҙам итә. Эш буйынса осрашыуҙар үткәргән ваҡытта өҫтәлдең уртаһына бальзамин кеүек ҙур булмаған, сәскәле үҫенте ултыртырға онотмағыҙ. Ул үҙ-ара килешеүгә булышлыҡ итер.
Әйткәндәй, Японияла офис хеҙмәткәрҙәре эштә йәшелсә лә үҫтерә икән. Айырыуса черри помидорына, ҡуҙаҡлы борсаҡҡа өҫтөнлөк бирәләр. Төп ниәттәре эш көсөргәнешен кәметеүгә ҡайтып ҡала.