1. Хыяллан!
Был кәңәш, көлкө кеүек күренһә лә, һөҙөмтәле. Ниндәй ҡаҙанышҡа өлгәшергә, кем булырға теләүең тураһында уйлап, хыял диңгеҙендә рәхәтләнеп йөҙөп ал. Күҙ алдына килтер: юрағаның юш килеп, уңыш йылмайҙы, ти. Шул тиклем ҙур ҡәнәғәтлек тойғоһо кисерерһең. Ә бының өсөн бит эшләргә кәрәк!
2. Үҙеңде дәртләндер.
"Әгәр ошоно эшләһәм, үҙемә үҙем бүләк яһайым" тигән маҡсат ҡуйыу ҙа ярҙам итә.
3. Маҡсат ҡуй.
Һәр эштең алдында ниндәйҙер ниәт торорға тейеш. Әгәр ул юҡ икән, ынтылыш та булмай. Эшеңә бәйле төп маҡсаттарҙы ҡағыҙға яҙып, яныңда тотоу ҙа һәлкәүлектән арынырға булышлыҡ итер.
4. Хәтирәләргә бирелеп ал.
Ниндәйҙер уңышҡа өлгәшкән сағыңды иҫкә төшөр. Әйтәйек, етәкселек маҡтау һүҙе әйткәндер, аҡсалата бүләк алғанһыңдыр. Шул саҡтағы ғорурлыҡ, ҡәнәғәтлек тойғоһон ҡабат кисергең килмәйме ни?
5. Яңылыҡ уйлап тап.
Эшеңә ниндәйҙер үҙгәреш, заманса йүнәлеш индереү буйынса төрлө кеше менән кәңәшләш: ситтән яҡшыраҡ күренә. Идея тыуҙы икән, уны тормошҡа ашырыу планын төҙө һәм алға — яңы бейеклектәргә!
6. Йыр тыңла.
Төрлө көйҙөң кәйефеңә нисек тәьҫир итеүен билдәлә. Әйтәйек, ҡайһы бер эште башҡарғанда күңел тулы тыныслыҡ теләй. Көндәлек мәсьәләләрҙе иһә ниндәйҙер көй аҫтында үтәү еңелерәк.
7. Елләткескә лә иғтибар ит.
Эш урынындағы һауа кәйефкә ныҡ тәьҫир итә. Шуның өсөн дә дөрөҫ температураны тоторға кәңәш ителә. Эҫе мәлдәрҙә шылдырып йөрөтә торған елләткес уңайлы булыр.

* * *
Эшеңдәге кире тойғоларҙың кабинеттағы тәртипкә лә бәйле булыуы ихтимал. Әйтәйек, өҫтәлдә энә төртөрлөк тә урын булмаһа...
Белгестәр әйтеүенсә, ҡағыҙға күмелгән эш өҫтәленә бер тапҡыр ғына күҙ һирпеп тә, уның хужаһының көсөргәнешле хәлдә булыуын билдәләргә мөмкин. Ундайҙарҙы яуаплы вазифаларға үрләтергә ярамай, ти менеджерҙар. Ҡыҫҡартыу мәлендә лә тәүге ҡармаҡҡа тап шундайҙар эләгеүсән.
Өҫтәл тәртиптә булмаһа, иғтибарыңды эшкә йүнәлтеүе ауыр. Әллә күпме башҡарылмаған бурыс торғанда, нисек алға йүнәлеш алырға мөмкин?
Ғөмүмән, эш өҫтәлендә әле ҡаралған мәсьәләгә бәйле ҡағыҙҙар ғына ятырға тейеш. Башҡаларын тартмаларҙа, йәшниктәрҙә һаҡлау һәйбәт булыр.