Юл-транспорт фажиғәләрендә балаларҙың йәрәхәт алыуын иҫкәртеүгә йүнәлтелгән сараны Юл хәрәкәте хәүефһеҙлеге дәүләт инспекцияһы идаралығы менән Башҡортостандың Мәғариф министрлығы ойошторҙо.
Юл йөрөү ҡағиҙәләрен иң яҡшы белеүсе исемен яулау маҡсатында республикабыҙҙың район-ҡалаларынан 25 команда көс һынашты. Ҡала менән ауыл мәктәптәренең сығыштары айырым баһаланды. Краснокама районынан иһә Иҫке Йәнйегет уҡыусылары ҡатнашты. “Шат күңелле ауыл ҡыҙҙары” исемле был команда Яңауылда республиканың төньяҡ-көнбайыш район-ҡалалары араһындағы КВН уйынының төбәк этабында еңеүсе булғайны.
Бәйгелә командаларҙың бер-береһен сәләмләүе (“Беҙ – уйындарҙың йәштәштәре”), “Скутер: рәхим итеп шыуығыҙ” капитандар конкурсы, “КВН-ды хәүефһеҙ һәм “ВИРТУОЗ” уйнайбыҙ” музыкаль өй эше, “Социаль реклама” видеоролик конкурстары баһаланды.
Ауыл мәктәптәре араһында “Шат күңелле ауыл ҡыҙҙары” командаһы яҡшы һөҙөмтә күрһәтте, Шаран районы командаһынан (гран-при яулаусылар) бары тик 0,2 балға ғына ҡалышып, беренсе урынды яуланы. Ренат Ғибәҙуллин – Краснокама районы командаһының берҙән-бер егете генә түгел, капитандар конкурсында ауыл мәктәптәре араһында иң юғары балл йыйыусы ла. Бөтә жюри ағзалары ла уның сығышына иң юғары баһа бирҙе. Ренат – “Иң яҡшы капитан” номинацияһы еңеүсеһе.
– Уйын бик күңелле үтте. Унда ҡатнашып, беренсе урынға сығыу айырыуса ҡанатландырҙы. Беҙҙең сығыштарыбыҙҙан тамашасыларға музыкаль өй эше айырыуса оҡшаны. Юл ҡағиҙәләре темаһына таҡмаҡтар әйтеп, уларҙы барыбыҙға ла үтәргә кәрәклегенә баҫым яһаныҡ. Ә программабыҙҙың иң тәьҫирле өлөшө йырҙарҙы үҙебеҙсә үҙгәртеп башҡарыу булды, – тип тәьҫораттары менән уртаҡлашты команда ағзаһы Айгөл Ғиләжева.
“КВН-ды хәүефһеҙ һәм “ВИРТУОЗ” уйнайбыҙ” конкурсы йомғаҡтары буйынса Краснокама командаһы еңеүсе дипломы менән бүләкләнде.
– Бәйгенең яҡшы кимәлдә уҙыуын һүҙ менән генә аңлатып бөтөрлөк түгел һымаҡ. Ун ике ҡала һәм ун өс ауыл мәктәбенән килгән ҡатнашыусылар барыһы ла етди әҙерлекле ине, көслө командалар менән ярышыуы ла ҡыҙыҡлы булды. Барыһына ла сығышыбыҙ оҡшаны, зал беҙҙе үҙ итте. Икенсе йылға ла конкурста гран-при яулау өсөн көс һынашып ҡарарға теләгебеҙ бар! – тип ниәттәре менән уртаҡлашты ҡатнашыусыларҙың тағы береһе Алина Кашапова.
КВН уйынсылары миҙалдар, Юл хәрәкәте хәүефһеҙлеге дәүләт инспекцияһы идаралығы һәм Мәғариф министрлығының Маҡтау грамоталары, иҫтәлекле бүләктәре менән билдәләнде.