Бөгөн был уҡыу йортоноң эшмәкәрлеге менән яҡындан танышмаҡсыбыҙ. Яңы закон буйынса башланғыс һөнәри белем биреү учреждениелары урта һөнәри белем биреү колледждары итеп үҙгәртелә. 83-сө лицейға ике уҡыу йорто — Иглиндәге 95-се һәм Шишмә районындағы 48-се училищелар — филиал булараҡ ҡушыласаҡ. Һөҙөмтәлә республикабыҙ ҡыҙҙары һәм егеттәре оҙаҡламай "Башҡортостан агросәнәғәт колледжы" тип аталған уҡыу йортонда белем аласаҡ.
Абруйлы уҡыу йортоноң сифатлы белгестәр әҙерләү өсөн матди-техник базаһы ныҡлы, белем алыусыларға бөтә шарттар булдырылған. 2009 йылда "Мәғариф" өҫтөнлөклө милли проектында ҡатнашып, 31 миллион һумлыҡ федераль грантҡа эйә булыу уҡыу йортона яҡшы йыһазландырылыу мөмкинлеген биргәйне. Шул йылдарҙа уҡыу корпустары, ятаҡхана капиталь төҙөкләндерелде. Ауыл хужалығы культураларын эшкәртеүсе заманса трактор һәм комбайндар, картуф баҫыуын эшкәртеүсе "Гримме" техникаһы йәштәрҙә ҙур ҡыҙыҡһыныу уятты. Лицейҙың үҙ баҫыуҙарында үҫтерелгән иген, картуф һәм йәшелсә балаларҙы ашханала көнөнә өс тапҡыр бушлай туҡландырырға мөмкинлек биргән.
Михайловка лицейы 45 йыл эсендә ете меңдән ашыу белгес әҙерләп сығарған. Бөгөн иһә унда 260 бала белем ала. Бында йәштәр ашнаҡсы-кондитер, тракторсы, шофер, йәшелсәсе, һатыусы профессиялары менән бер рәттән, умартасы һөнәрен дә үҙләштерә. Хеҙмәт баҙарындағы ихтыяжды иҫәпкә алып, бер юлы әллә нисәмә һөнәргә өйрәтәләр. Уҡыу йорто умартасылыҡ продукттарының сифатын билдәләү, бал ҡорто һәм иңкеш үрсетеү лабораториялары, ҙур умарталығы менән хаҡлы ғорурлана ала. Уҡыусылар был һөнәрҙең бөтә нескәлектәрен өйрәнеп, оҫта белгескә әүерелә: балды пакеттарға тултырыуҙы, инә ҡорттарҙы яһалма үрсетеүҙе лә үҙләштерә. Ә хеҙмәт баҙарында бындай белгестәргә ихтыяж арта ғына. Данлыҡлы "Алексеевка" хужалығы һәм баш ҡаланың йәмәғәт туҡланыуы тармағы предприятиелары Михайловкала уҡыған йәштәрҙе үҙенә практика осоронда уҡ эшкә йәлеп итә. Башҡортостан дәүләт аграр университетында иһә килешеү нигеҙендә ошо йүнәлештә уҡыуҙы дауам итеп, юғары белем алып сығырға була.
Юғары квалификациялы уҡытыусылар коллективы студенттарға һөнәр оҫталығы менән бергә яҡшы тәрбиә, рух ныҡлығы биреүгә, уларҙы ысын шәхес итеп тәрбиәләүгә көс һала. Үҙешмәкәр сәнғәт түңәрәктәре эшләй, спорт менән шөғөлләнеү өсөн бөтә мөмкинлектәр бар. Ә инде йәшәү шарттары хаҡында шуны әйтергә була: 2012 йылда 80 уҡыу йорто араһында үткәрелгән "Иң яҡшы ятаҡ" республика бәйгеһендә михайловкаларҙың беренсе урынды яулауы осраҡлы түгел.
Егеттәр һәм ҡыҙҙар!
83-сө Михайловка һөнәрселек лицейының яңы исемен хәтерҙә ҡалдырығыҙ. Күп профилле агросәнәғәт колледжына заманса эшсе һөнәрҙәрен үҙләштерергә рәхим итегеҙ!
Колледждың директоры Илшат Әминев, баш ҡалалағы Р. Ғарипов исемендәге 1-се башҡорт республика гимназия-интернатын тамамлағандан һуң, Башҡортостан дәүләт аграр университетында белем алған, Баймаҡ районында башланғыс һөнәри белем биреү буйынса тәжрибә туплап, оҫта ойоштороусы, уңған етәксе булып өлгөргән. Ауыл хужалығы фәндәре кандидаты Илшат Нәжметдин улы "Башҡортостандың мәғариф отличнигы" тигән маҡтаулы исем, Рәсәй Мәғариф министрлығының Почет грамотаһы менән бүләкләнгән.