Конкурстың бер нисә номинацияһы булдырылды. "Айыҡ йәшәү рәүешен пропагандалауҙа иң яҡшы тәжрибә" тигәнендә еңгән ауылға 150 мең һумлыҡ сертификат биреләсәк. Ә "Сәләмәт тормош идеяларын хуплау һәм милли-мәҙәни йәһәттән ҡаҙаныштар" исемлеһендә тәүге урынды алғанға — 35, икенсе, өсөнсө баҫҡысты биләгәндәргә 25 һәм 15 мең һум күләмендә бүләк биреү ҡаралған.
Шулай уҡ төрлө коллектив, берләшмә, советтар араһында "Граждандарҙың әүҙемлеген арттырыуҙа иң яҡшы тәжрибә" тигән номинация булдырылды. Унда тәүге өс урынды яулаған еңеүселәр 25, 20, 15 мең һум күләмендә аҡсалата бүләкләнәсәк. Ауыл хәбәрселәре, биләмәләрҙең рәсми сайттары, матбуғат баҫмалары хеҙмәткәрҙәре өсөн дә айырым номинация бар.
Конкурсҡа тәүгеләрҙән булып Бишҡурай ауыл Советы ҡушылды. Унда ауыл биләмәләре башлыҡтары, район хакимиәтенең йәштәр менән эшләү буйынса белгестәре, ҡатын-ҡыҙ советтары ағзалары, киң йәмәғәтселек, мәҙәниәт өлкәһе вәкилдәре ҡатнашлығында күркәм байрам уҙҙы. Сара күптән түгел капиталь ремонт үткән Бишҡурай урта мәктәбе менән танышыуҙан башланды. Класс бүлмәләренең биҙәлеше, Хәрби дан музейының торошо тикшерелде, спорт залында йәш гимнастарҙың сығышы ҡаралды. Әйткәндәй, был төбәк ябайҙарҙан түгел: ике тапҡыр Советтар Союзы Геройы Муса Гәрәевте, Социалистик Хеҙмәт Геройы Хәләф Ғилдановты үҫтергән!
Артабан йыр-моң бәйгеһе, Бишҡурай һәм Үрге Маншыр урта мәктәптәре уҡыусылары араһында спорт ярыштары уҙҙы.
"Айыҡ ауыл-2014" сараһының рәсми өлөшө Бишҡурай ауыл мәҙәниәт йортонда дауам итте. Бында Иләкшиҙенән Лүзә Санникованың ҡул эштәренә, Ташшишмәлә умартасылыҡ менән шөғөлләнгән Фәүил Фикиевкә, 50 йыл бергә йәшәгән Филүсә һәм Рәмил Баһмановтарға, уҡытыусылар династияһы булған Гәрәевтәргә бағышланған бай йөкмәткеле күргәҙмә ҡаршы алды. Ауылдың һәүәҫкәрҙәре әҙерләгән концерт һәр кемдең күңеленә хуш килде.
Тантананың рәсми өлөшөн асып, район Советы секретары И.В. Никифоров конкурстың маҡсаты, алда торған бурыстар менән таныштырҙы. Бишҡурай ауыл биләмәһе башлығы З.Ә. Хәҙимуллин иһә халыҡтың тормош-көнкүреш шарттары хаҡында бәйән итте. Әйткәндәй, биләмәгә биш ауыл берләшкән, 467 хужалыҡта 1104 кеше йәшәй.
Район хакимиәтенең бәлиғ булмағандар эше һәм уларҙың хоҡуҡтарын яҡлау комиссияһы секретары Г.Ө. Александрова менән урындағы полиция бүлеге начальнигының йәмғиәт тәртибен һаҡлау буйынса урынбаҫары майор М.Ә. Зарипов төбәктә эскелеккә бәйле хәлдәргә байҡау яһаны, уны булдырмау йәһәтенән ойошторолған саралар хаҡында һөйләне. Мәҙәниәт бүлеге етәксеһе Ғ.Ш. Әлимбәковтың, Бишҡурай ауыл Советы ҡарамағындағы ҡатын-ҡыҙҙар берләшмәһе ағзаһы Л.Г. Төхвәтуллинаның, Ҡаҙыр ауыл биләмәһе башлығы Р.Ғ. Ғәббәсовтың сығыштары ла тормошсан миҫалдарға бай, йөкмәткеле булды.
Әйтергә кәрәк, илештәр ифрат тырыш, ныҡышмал. Ошондай күркәм холоҡ-фиғелле хеҙмәтсән халыҡты насар ғәҙәттәрҙән аралау, рухын тағы ла күтәреү, эшкә дәртен арттырыу, өлгөлө йәмғиәт төҙөү йәһәтенән ойошторолған "Айыҡ ауыл" конкурсының әһәмиәте баһалап бөткөһөҙ.