Гимназияның башланғыс кластар уҡытыусыһы Эльмира Шакированың һүҙҙәренә ҡарағанда, күп ата-әсә балаларын нәҡ ошо белем усағына бирергә теләй, шуға күрә әле бында меңгә яҡын уҡыусының булыуына һис тә ғәжәпләнергә ярамай.
Эльмира Йәнтимер ҡыҙы оҙатыуында беҙ – I "Г" класында. Туған тел дәресе бара. Юғары категориялы уҡытыусы Гөлсәскә Ғәзизова балаларҙы башҡорт әкиәттәренең эстәлеге менән таныштырыуҙан тыш, әҫәргә ниндәй мәғәнә һалыныуын тәфсирләп аңлата. Улай ғына ла түгел, бәләкәстәр персонаждарға ҡарата үҙ фекерҙәрен дә әйтә.
– Малай һәм ҡыҙҙарға мөмкин тиклем төплө белем бирергә, һәр яңылыҡты ябай тел менән аңлатырға тырышам, – ти мөғәллимә. – Өйҙө күҙ алдына килтерегеҙ әле. Уның нигеҙе ныҡ булған һайын йортоғоҙ ҙа һеҙгә шул хәтлем оҙаҡ хеҙмәт итәсәк. Шул уҡ ваҡытта уларҙы рухлы итеп тәрбиәләү, туған телгә һөйөү уятыу хаҡында ла онотмайым.
Бынан тыш VIII "В" класына ла һуғылдыҡ. Башҡорт теле һәм әҙәбиәте кабинетының ишеген асып ингәс тә шунда уҡ иғтибарҙы үҙенсәлекле биҙәлеш йәлеп итте. Кабинет түгел, ә торғаны музей инде. Әҙиптәрҙең фоторәсемдәре эленгән, шиғырҙан өҙөктәр яҙылған, бүтән төрлө йыһаздар ҙа етерлек. Уҡытыусы Эльвира Баянова белдереүенсә, башҡорт мөхитен булдырыу өсөн балалар үҙҙәре күп көс түккән.
Башҡорт гимназияһында белем биреү менән бергә тәрбиәүи мәсьәлә лә өҫтөнлөклө йүнәлеш һанала. Түңәрәктәрҙең күплеге хайран итте. Мәҫәлән, ритмика, спорт (шашка, тхэквондо, айкидо, урыҫ лаптаһы) һәм бүтән түңәрәктәргә үҫмерҙәр теләп йөрөй. Әйткәндәй, XI класс уҡыусыһы Руслан Фәйзуллин – гимназияның ғорурлығы, ул ҡаяға үрмәләү буйынса ике тапҡыр донъя чемпионы исемен яулаған. Шашка (етәксеһе – Александр Мельников) уйнарға яратыусылар ҙа йыш ҡына еңеү менән ҡайта. Кристина Осипова, Аида Игелекова, Марсель Шәрәфетдиновтарҙың уңышы – шуға асыҡ миҫал. "Дуҫлыҡ" (Светлана Батыршина) һәм "Стиляга" (Лия Ғәйнетдинова) бейеү ансамблдәрендә шөғөлләнеүселәр мәктәп тормошондағы сараларҙа һәр саҡ әүҙем ҡатнаша.
Гимназия директоры урынбаҫары Айгөл Игелекова билдәләүенсә, һәләтһеҙ бала булмай, бары тик уны ваҡытында үҫтерә белергә кәрәк.
Күңелдәрендә бөйөк Шағир рухын йөрөткән Башҡортостандың атҡаҙанған уҡытыусылары Фәйрүзә Үтәбаева, Гөлназ Әхмәҙиева, Ләйсән Мәмбәтҡолова, Венера Ғәлимова, Башҡортостандың мәғариф алдынғылары Фатима Бикбулатова, Сания Ишбулатова, Светлана Аҙнағолова, Миңниә Йәғәфәрова, Флүрә Шәһиғәлина, Гөлниса Мәхейәнова һәм башҡалар йәш быуында туған телгә һәм тыуған ергә һөйөү тәрбиәләүгә ҙур көс һала.