Баш мөхәррир Ильяс Таҡаловтың ошо урам буйлап тәүге тапҡыр эшкә килгән мәленә дүрт тиҫтә йылдан ашыу ваҡыт уҙып та киткән: 17 йәшлек егет 1971 йылда фотохәбәрсе итеп алынғайны. Ул саҡта редакция менән типография бер бинала урынлашҡайны. Йәш белгес "Коммунизм өсөн" гәзитенең коллективында тиҙ арала үҙ кеше булып китте. Хәйер, Баймаҡ мәктәп-интернатында уҡыған йылдарында уҡ фотолабораторияла эшләне, мәҡәләләре, фотоһүрәттәре район гәзитендә баҫылып торҙо, "йәш хәбәрсе" исемен йөрөттө.
Тырыш, тынғыһыҙ, эҙләнеүсән, өҫтәүенә БДУ-ла ситтән тороп белем алған Ильяс Таҡалов тиҙ арала редакция етәкселәренең иғтибарын яуланы. Оҙаҡламай уны гәзиттең ижтимағи-сәйәси бүлеге хәбәрсеһе итеп ҡуйҙылар, артабан мөдирлек вазифаһын ышанып тапшырҙылар. 25 йәшендә иһә Таҡалов мөхәррир урынбаҫары йөгөн тарта башланы.
Свердловскиҙағы Юғары партия мәктәбендә алған белеме Ильяс Исмәғил улына журналистика эшен тағы ла уңышлыраҡ ойошторорға ярҙам итте. Оҙаҡламай ул Әлшәй районының "Ленинизм байрағы" гәзитенең баш мөхәррире вазифаһына тәғәйенләнде. Өс телдә сыҡҡан был баҫмала эшләү, аҙаҡ тыуған төйәгендә донъя күргән "Ауыл уттары"на етәкселек итеү дәүерендә Ильяс Исмәғил улы журналистика хеҙмәтенең барлыҡ нескәлектәрен үҙләштерҙе. Бөгөн иһә ул — һайлаған һөнәренә ғүмер буйы тоғро ҡалған сал сәсле матбуғат уҙаманы. Фиҙакәр хеҙмәтен республика етәкселеге юғары баһаланы: журналисҡа 2004 йылда "Башҡортостандың атҡаҙанған матбуғат һәм киң мәғлүмәт хеҙмәткәре" тигән маҡтаулы исем бирелде.
Ильяс Таҡалов әүҙем йәмәғәт эшмәкәре булараҡ та ҙур абруй ҡаҙанған кеше: оҙаҡ ваҡыт урындағы башҡорт ҡоролтайына етәкселек итте, бер нисә тапҡыр район Советы депутаты итеп һайланды, ике тиҫтә йыл Йылайырҙағы журналистар ойошмаһы рәйесе йөгөн уңышлы тарта.
Таҡаловтар өлгөлө ғаилә булараҡ та киң танылыу алған. Ильяс Исмәғил улы ҡатыны Сәфирә Ғәйнислам ҡыҙы (әйткәндәй, ул 40 йылға яҡын балалар поликлиникаһында шәфҡәт туташы булып эшләп, быйыл хаҡлы ялға сыҡты, Башҡортостандың атҡаҙанған һаулыҡ һаҡлау хеҙмәткәре) менән өс ул тәрбиәләп үҫтерҙе, юғары белем алырға ярҙам итте. Хәҙер инде барыһы ла ғаиләле. Өлкәндәре Илфат Рәсәй Һаҡлыҡ банкының Йылайырҙағы бүлексәһенә етәкселек итә, дүрт бала атаһы. Уртансылары Самат — район хакимиәте башлығы урынбаҫары, бер ҡыҙ, бер малай тәрбиәләй; кинйәләре Илгиз Өфөлә йәшәй, ул үҫтерә. Йәш Таҡаловтар, уларҙың балалары төрлө кимәлдә уҙғарылған спорт ярыштарынан, мәҙәни сараларҙан ситтә ҡалмай, уңыштары ла бихисап. Әйтәйек, Алмас "Байыҡ" республика бейеү конкурсында оҫталығы менән дан алһа, уның игеҙәк ҡустылары Айгиз менән Нургиз кикбоксинг буйынса Рәсәй чемпиондары исемен йөрөтә.
Ғөмүмән, барыһына ла ҡәнәғәт Ильяс Исмәғил улы. Үткәндәре үкенесле булманы, киләсәгенең тағы ла бәрәкәтле килеренә ышана 60 йәшлек ир-азамат.