Радмир Фәйзуллин – Архангел районынан. Яңыраҡ ҡына Ставрополь крайының Буденновск ҡалаһында хеҙмәтен тултырып ҡайтҡан егет артабан да яҙмышын армия менән бәйләргә булған. Алкин ҡасабаһы эргәһендәге хәрби часты юҡҡа һайламаған икән. Өйгә яҡыныраҡ бул, тип әсәһе үтенгән.
Егет менән һөйләшкән арала беҙҙе оҙатып йөрөйәсәк кесе сержант килеп етте.
Ринат Ибраһимов – Күмертау егете. Өфө дәүләт авиация техник университетын тамамлағандан һуң хәрби бурысын үтәргә булған.
— Минеңсә, бөгөн илдә әрмелә булған егеттәргә ташламалар күберәк. Хәрби хеҙмәтемде тамамлағас, эшкә урынлашыуы еңелләшер тигән фекерҙәмен, – ти егет.
Һөйләшә-һөйләшә инженер-сапер ротаһы күнекмә үткән ергә атлайбыҙ. Шул арала Ринат атаһы тураһында ла һөйләп өлгөрҙө. Шакир Шәғәли улы Афған һуғышында ҡатнашҡан яугир икән. Бихисап наградалары бар.
— Атайым һуғыш тураһында һөйләргә яратмай. Шулай ҙа миңә гел генә хәрби хеҙмәткә барырға кәрәк, ир-егет өсөн үҙ-үҙен генә түгел, яҡындарын, Тыуған иленең именлеген яҡлай белеү мөһим, тип ҡабатлай ине, — ти ул.
Саперҙар ротаһы рота командиры өлкән лейтенант Артур Кәлимуллин етәкселегендә хәрби әҙерлек үтә. Улар һуғыш ваҡытында ла, тыныс тормошта, төрлө тәбиғәт ғәрәсәте эҙемтәләрен бөтөрөүҙә лә эшкә тәүгеләрҙән булып тотона. Был егеттәр әрменең авангарды тип иҫәпләнһә лә, уларҙың хеҙмәте яу бөткәндән һуң да дауам итә.
Инженер-сапер бригадаһы «Баҡыр даға» тип аталған яңы алымды өйрәнә ине. Ул тәүге тапҡыр Афған һуғышында ҡулланылған.
Сапер бригадаһында хеҙмәт итеүселәр алған белемен әрменән ҡайтҡас та ҡуллана ала. Улар нефть ятҡылыҡтарын үҙләштергәндә, төрлө шахталарҙа шартлатыусы булып эшләү мөмкинлегенә эйә.
Бригадала махсус дәрестәр йыш үткәрелә. Уны беҙ ҙә ситтән күҙәттек. Һуңынан командир егеттәр менән аралашырға рөхсәт бирҙе.
Кирилл Прохоров — Ульяновск ҡалаһы егете.
— Башҡортостан тураһында быға тиклем ишеткәнең булдымы? — тип һорайым.
— Әлбиттә! Башҡорт ҡымыҙы, балы тураһында белә инем. Шулай ҙа республика тураһында уның КВН командаһы аша күберәк хәбәрҙармын, сөнки тап отҡорҙар һәм шаяндар өсөн текстар яҙыусы кеше булараҡ билдәлемен, – тип яуап бирә ул.
– Армияла көлкөгә урын бармы?
– Бында көн дә мажара!
Һалдаттар ротаһының командиры Артур Кәлимуллин Төмән өлкәһенән килгән. Уның килешеүе 2016 йылға тиклем төҙөлгән.
– 2006 йылда хәрби училищеға уҡырға барҙым. Унда тәртип яғы ун тапҡырға ҡатыраҡ. Хәрби реформанан һуң хеҙмәт ожмахҡа тиң. Кейендереү, ашатыу йәһәтенән дә хәлдәр шәп, хеҙмәтте ойоштороу кимәле лә яҡшырҙы. Бер йыл күҙ асып йомғансы үтә лә китә. Ата-әсәләр борсолмаһын, – тип буласаҡ һалдаттарҙың туғандарын тынысландырҙы ул.
Артур Эмиль улы – хәрбиҙәр династияһын дауам итеүсе. Олатаһы Мөхәмәтхан тәүге көндәрҙән үк Бөйөк Ватан һуғышына алынған һәм Берлинғаса барып еткән. Ҡыҙыл Йондоҙ ордены, “Батырлыҡ өсөн” миҙалы менән наградланған. Артурҙың ике ағаһы ла – хәрбиҙәр.
Ринат беҙҙе оҙатырға сыҡты. Ул һигеҙ ай хеҙмәт иткән, йәйгә ҡайта.
– Киләсәккә пландарың нисек? Һөйгән йәрең көтәлер? – тип йылмаям.
– Дембелдән һуң бер аҙна ял итәм дә эшкә урынлашам. Һөйгәнем Алинаға тәҡдим яһаясаҡмын, йәйгә туй ҙа үткәрербеҙ әле. Ә бына атай-әсәйемә гәзит аша күп сәләм күндерәм!

Зөлфиә ИБРАҺИМОВА менән телефон аша бәйләнешкә индек:
— Зөлфиә Йәүҙәт ҡыҙы, һеҙҙе “Башҡортостан” гәзитенән борсойбоҙ.
— Хәбәрегеҙ изге булһын!
— Улығыҙ Ринаттан сәләм еткергебеҙ килә.
— Ҡалай ҡыуаныслы хәбәр! Нисек хеҙмәт итеп йөрөй? Имен-һаумы?
— Аллаға шөкөр! Барыһы ла һәйбәт. Әсәйем борсолмаһын, яҡшы ашаталар, өҫтөм бөтөн, хеҙмәттәштәрем ышаныслы тип әйтергә ҡушты.
— Бик шатмын. Берҙән-бер улыбыҙҙы хәрби хеҙмәткә ебәреүе ҡыйын булды, шулай ҙа уның үҙе ҡарар ҡабул итеп, үҙ теләге менән һалдат итеге кейеүе менән ғорурланам. Беҙ уны көтәбеҙ! – тине Зөлфиә апай.