Юғары категориялы табип, Башҡортостандың һаулыҡ һаҡлау отличнигы, 30 йылдан ашыу медицина өлкәһендә эшләгән кешенең ауырыуҙар менән мөғәмәлә итеү тәжрибәһе етерлек. Ысынлап та, уның һүҙҙәре йөрәккә май булып яғыла. Ә ауырыуҙар өсөн был – иң мөһиме. Бөгөн ошондай табиптарҙың булыуы һөйөнөслө. Юғиһә, бәғзеләренең тупаҫ һөйләшеүен ишетмәҫ өсөн генә дауаханаға бармай ҡалаһың ҡайһы ваҡытта.
Стационарҙың эшләй башлауына 10 йылдан ашыу инде. Уны башта эшенән айырылмай ғына дауаланыусылар өсөн асҡандар. Хәҙер теләгән һәр кем сәләмәтлеген нығыта ала бында. Күберәк хаҡлы ялдағылар мөрәжәғәт итә. Бөтәһе 36 койка-урын бар, бер үк ваҡытта 40-ҡа яҡын кеше дауалана.
– Диагноздарына ҡарап беҙ уларҙы Ольга Ивановна менән икәүләп ҡабул итәбеҙ. Ул – һөнәре буйынса невролог, ә мин – табип-кардиолог. Көн дә ике-өс ауырыу килә. Стационарға һалыр алдынан сирҙең етдилек кимәлен һәм беҙҙә дауалау мөмкинлеге бармы икәнлеген асыҡлайбыҙ. Был бик мөһим, сөнки бында улар 1,5 – 2 сәғәт тирәһе генә була ла өйҙәренә ҡайтып китә. Дауаханалағы кеүек, көн буйы табип күҙәтеүендә тормайҙар, – ти Ирина Александровна.
Коллектив ҙур түгел. Шуға бер ғаилә кеүек татыу-берҙәмдәр. Шәфҡәт туташтары Ильвина Гәрәева, Ольга Михайлова, Марина Попцовалар ауырыуҙарға ҡарата иғтибарлы, ихтирамлы. Ольга Тихонова хаҡында ла йылы һүҙҙәр генә ишетергә мөмкин. Ошондай матур коллектив туплауҙа, әлбиттә, етәксенең өлөшө ҙур.
– Мин бында бер нисә йыл рәттән дауаланам. Ҡан баҫымым юғары. Ҙур дауаханаларҙа ла ятырға булыр ине, ләкин үҙебеҙҙең стационарға етмәй. Ҡыҙҙарға ла өйрәнелгән. Улар шул тиклем яғымлы. Ирина Александровна менән һөйләшеп кенә сыҡһаң да, үҙеңде яҡшы тоя башлайһың. Кәрәкле һүҙҙәрҙе ҡайҙан табалыр... – тип рәхмәт һүҙҙәрен яуҙыра хаҡлы ялдағы Мөслимә апай Бәширова.
– Ысынлап та, ул дарыуҙар менән генә түгел, тәү сиратта яҡшы һүҙе менән дауалай, – тип ҡушылды уға Лидия апай Рәхимова. – Бөтә табиптар ҙа Ирина Александровна кеүек эшләһә, сирлеләр ҙә, бәлки, әҙерәк булыр ине. Ул сир тураһында төбөнә төшөп һорашып, дауалау курсы билдәләй. Поликлиникала төрлө йүнәлештәге белгестәр эшләй. Кәрәк тип тапһа, уларҙа тикшереү үтер өсөн йүнәлтмәләр яҙып бирә. Массаж, физиотерапия кабинеттарына йөрөйбөҙ. Сиратҡа яҙылып көтәһе түгел, барыһын да бер юлы үтеү мөмкинлеге бар. Мин дә бында бер нисә йыл рәттән дауаланам. Ауырыуҙарға ҡарата мөнәсәбәт шул тиклем яҡшы.
Ирина Александровна хаҡында әллә күпме һөйләргә булыр ине. Бергә эшләгән хеҙмәттәштәре лә: «Эшкә һәр ваҡыт күтәренке кәйеф менән киләбеҙ», – тип юҡҡа ғына әйтмәй. Йылы һүҙ – йән аҙығы, тиҙәр. Ә Ирина Александровнаның йылыһы барыһына ла етерлек.