Ярайһы уҡ йылдар үтеп, йәнә улар менән осрашырға тура килгәс, геройҙарымдың һис үҙгәрмәгәнен күреп: “Ҡайһылай бәхетлеләр!” – тип уйлап ҡуйҙым. Хәйер, уны үҙҙәре лә белә. Йыл аҙағында ғаилә ҙур шатлыҡ кисерҙе: йорт хужабикәһе Таңһылыу Әүәлбаева үҙенең оло ғүмер байрамын – 75 йәшлек юбилейын билдәләне. Ә йорт хужаһы Миҙхәт Байрамғоловҡа быйыл 85 йәш тула. Әйткәндәй, уларҙың икеһенә лә үҙ йәшен биреүе ҡыйын: етеҙ хәрәкәтле, йәш сырайлы геройҙарым – әле лә иғтибарҙы йәлеп итерлек матур пар.
Таңһылыу Ғүмәр ҡыҙы һәм Миҙхәт Әсфәндиәр улының бергә йәшәүҙәренә 50 йылдан ашыу ваҡыт үтеп тә киткән. Бер-береңә ҡарата ихтирам һәм иғтибар, ярты һүҙҙән аңлау һәләте, кәңәшләшеп донъя көтөү, балаларҙы бергәләп тәрбиәләү кеүек сифаттарға эйә булғанда, шулай ярты быуат бәхетле йәшәргә мөмкиндер. Һөйөнөс-көйөнөстәрҙе уртаҡ кисереү, йөктө тигеҙ тартыу ҙа был парҙы бер бөтөн иткәндер. Яҙмыштары ла оҡшаш уларҙың: атайһыҙ үткән бала саҡ, аслы-туҡлы көн итеү, иртә ҡул араһына инеү, тырышып-тырмашып белем алыу...
Темәс ауылы ҡыҙы Таңһылыуға бигерәк тә ауырға тура килә. Атаһы һуғышҡа китеп, Ленинград блокадаһына эләгә. Әсәһе бер үҙе күмәк бала менән яңғыҙ ҡала. Әммә бәләкәйҙән тырыш һәм ныҡышмал ҡыҙ уҡыуға зирәк була. Хәреф танырға һәм яҙырға өйрәткән беренсе уҡытыусыһы Һәҙиә Азаматованы бик ҡәҙерләп телгә ала. Тап уға оҡшарға тырышып, киләсәген уҡытыусылыҡ менән бәйләргә ҡарар итә – Темәс педагогия училищеһына уҡырға инә. Ҡыҙғанысҡа ҡаршы, ике йылдан һуң белем усағы ябыла. Күптәр уҡыуын – Белорет, ҡайһы берәүҙәр Мораҡ педагогия училищеһында дауам итә. Таңһылыу үҙҙәренә яҡыныраҡ булған Белоретты һайлай. Дипломлы йәш белгесте юллама буйынса Баймаҡ районының Әхмәр ауылына уҡытырға ебәрәләр. Мәктәп директоры булып эшләгән Миҙхәт Байрамғолов ҡыҙҙы күргәс, бер аҙ юғалып ҡала: йөрәге, “бына ул һин эҙләгән ҡыҙ” тигәндәй, шашынып тибә. Үҙенә килешеп торған оҙон толомдары, һылыулығы егеттең күңелен ялмап ала.
Йәш белгес күрше Атанғол ауылындағы башланғыс мәктәптә эш башлай. Тәүге тапҡыр ойошторолған Яңы йыл кисәһендә балалар ғына түгел, ололар ҙа ҡатнаша. Мәктәп ауылда берҙән-бер мәҙәни-ағартыу үҙәгенә әйләнә. Төрлө кисәләр, байрамдар үткәреү, концерттар, спектаклдәр ҡуйыу кеүек барлыҡ сараларҙың ойоштороусыһы Таңһылыу Әүәлбаева була. Йәш уҡытыусының эшен күҙәтеүсе директорҙың да юлы мәктәпкә йышая төшә. Ахыр килеп, ике йәш йөрәк өйләнешеп ҡуя.
Артабан йәштәрҙе Ишмырҙа ауылындағы һигеҙ йыллыҡ мәктәпкә эшкә ебәрәләр. Икеһе лә ситтән тороп Башҡорт дәүләт университетын тамамлай. Баймаҡ ҡалаһында бер нисә йыл эшләгәндән һуң, тыуған яҡтарына ҡайтып төпләнәләр. Төркмәндә Таңһылыу Ғүмәр ҡыҙы иңенә яңы балалар баҡсаһы төҙөү яуаплылығы ята.
Алтындан да ҡиммәт үткән йылдар, тип хәтерләүҙәре лә юҡҡа түгел ветерандарҙың. Бар көндәре хеҙмәттә, халыҡ араһында уҙа. Ҡайҙа ғына эшләһәләр ҙә, кеше менән уртаҡ тел табып, үҙҙәренән һуң яҡшы хәтирәләр генә ҡалдыра улар. Йорт хужабикәһе баҡса үҫтерергә яратһа, Миҙхәт Байрамғоловты күптәр һәүәҫкәр рәссам булараҡ яҡшы белә. Уларҙың быуыны бигерәк дәртле һәм һөнәрле була шул. Уҡытыусылар ауыл йәштәре менән берлектә агитбригадаларҙа сығыш яһай, концерт, спектаклдәр ҡуя. Миҙхәт Әсфәндиәр улы әҫәрҙе сәхнәләштереүҙән алып биҙәү эштәренә тиклем атҡарып сыға.
Шулай ҙа геройымдың иң ҙур эше – Төркмән ауылында мәшһүр ҡурайсы Ғата Сөләймәновҡа арналған музей һәм Туғажман тауында ҡурайға ҡуйылған беренсе һәйкәл. Әйткәндәй, музейҙа һирәк осрай торған экспонаттар һаҡлана, ҡурайсының шәхси әйберҙәренең һаны ғына 400-ҙән артып китә. Ә инде оҫта ижад иткән картиналар, портреттар хаҡында әйтеп тораһы ла түгел! Исемдәренән үк уларҙың йөкмәткеһен аңларға була: “Төйәләҫ шулай башлана”, “Яҙ һулышы”, “Ҡыш аҙағы”, “Таныш һуҡмаҡтар” һәм башҡалар.
Хаҡлы ялға сыҡҡас, райондың абруйлы педагогтары Баймаҡ ҡалаһына күсеп килә. Бында ла улар ҡул ҡаушырып ултырмай: ҡала мөхитенә ылығып, йәмәғәт эштәрендә әүҙем ҡатнашалар. Таңһылыу Әүәлбаева Мәүжидә Айытҡолова етәкселегендәге “Ҡомартҡы” фольклор ансамбленә йөрөй. Ул – “Ағинәйҙәр” клубының иң әүҙем ағзаһы ла. Миҙхәт Байрамғолов та мәҙәни тормошта янып эшләй. “Атайсал тип янған йөрәктәр” клубы ағзаһы райондың рәссамдар ойошмаһын етәкләй, төрлө күргәҙмәләрҙә ҡатнаша.
Уларҙың бәхет сере – балаларының ата-әсә йөҙөнә ҡыҙыллыҡ килтермәүендәлер. Ике улы ла юғары белем алып, әле етәксе вазифалар биләй. Фирғәттәре – Өфөләге Республика перинаталь үҙәге етәксеһе, Булаттары – отставкалағы подполковник, әле район хакимиәтенең ауыл хужалығы идаралығында эшләй. Алты ейән-ейәнсәргә бәхетле өләсәй һәм олатай ҙа улар. Райондың мәғариф тармағында ғына түгел, мәҙәниәт өлкәһендә лә тәрән эҙ ҡалдырған, бер-береһенә мөхәббәтен һүрелтмәгән абруйлы шәхестәрҙең үткәне лә, бөгөнгөһө лә алтындан ҡиммәт.