Башҡортостан дәүләт аграр университеты студенттарын ҡотларға һәм маҡтарға урын бар: ошо көндәрҙә улар Алтайҙан шатлыҡлы хәбәр алып ҡайтты — Бөтә Рәсәй студенттарының махсус отрядтары слетында "Студенттар эшмәкәрлеген ойоштороусы иң яҡшы уҡыу йорто" номинацияһында икенсе урынға лайыҡ булды.
Башҡортостандың йәш аграрсылары өсөн мәртәбәле еңеү был, сөнки сарала илдең 40 төбәгенән 59 юғары уҡыу йорто ҡатнашҡан. Улар араһында Тимирязев исемендәге Рәсәй дәүләт аграр университеты кеүек абруйлылары булыуын да иҫәпкә алһаң, республикабыҙҙың йәш аграрсыларына, ысынлап та, "Афарин!" тиергә генә ҡала. Әйткәндәй, улар быға тиклем дә һыр бирмәне, һуңғы йылдарҙа өс тапҡыр — икенсе, ике тапҡыр беренсе урынды яуланы. "Башаҡ", "Ауыл тормошо", "Игенсе", "Төҙөкләндереүсе", "Айболит" отрядтары студенттарын йәйге семестрҙа республикабыҙҙың төрлө төбәгендә осратырға мөмкин. Йәштәр комбайн штурвалында ла һынатмай, заманса техникаға оҫта идара итә, малсылыҡ комплекстарына яңы һулыш алып килә. Юғары уҡыу йортонда белем алыусы егет һәм ҡыҙҙар, беренсенән, лайыҡлы алмашсылар буласағын хеҙмәттә раҫлаһа, икенсенән, Башҡорт дәүләт аграр университетының абруйын күтәрә.

Рим ӘБЛӘЕВ, Рәсәйҙең Ауыл хужалығы министрлығына ҡараған юғары уҡыу йорттары студенттарының төҙөлөш отрядтары ветерандары советы рәйесе: — Университетта махсуслаштырылған студент отрядтары 2007 йылда тергеҙелде, мине "Башаҡ"тың командиры итеп тәғәйенләнеләр. Шул уҡ йылда отрядыбыҙ республикала иң яҡшыһы булып танылды. Бөтә Рәсәй студенттар хәрәкәтен үҫтереүҙең әһәмиәте ҙур, сөнки үҙ-ара хеҙмәттәшлек киңәйә, ошо сараға ҡушылыусылар арта. Бынан тыш, буласаҡ белгестәр һөнәренең нескәлектәре менән ныҡлап таныша, тәжрибә туплай һәм, әлбиттә, яҡшы ғына эш хаҡы ла ала.