Мосолмандарҙың VII съезы ошоно раҫланы
“Аллаһ Тәғәләнең ҡушыуы буйынса һәр кемегеҙ — көтөүсе: хакимға — халҡы, ир-егеткә — ғаиләһе, ҡатын-ҡыҙға йорт йәме һәм башҡаларға ниҙер өсөн яуаплылыҡ йөкмәтелгән”, — тигән Ибн Ғүмәр. Был йәһәттән бөгөн дини ойошма етәксеһенә айырыуса ҙур бурыс ҡуйылған: ул халыҡ араһында мәғрифәтселек, иман нуры таратыу менән бергә төбәктең, илдең именлеген, милләт, конфессия-ара бәйләнештәрҙең ныҡлығын тәьмин иткән төп көстәрҙең береһе булып тора.

Күп милләтле Башҡортостан тотороҡло үҫеш кисергән тыныс республика булараҡ билдәле. Ҡаҙаныштың нигеҙендә, әлбиттә, халыҡтарҙың бер-береһе менән дуҫ-татыу йәшәүе, теленә, мәҙәниәтенә, йолаларына ихтирам менән ҡарауы, именлеккә ынтылышы һәм башҡа күркәм сифаттар ята. Был — илдә дөрөҫ сәйәсәт алып барылыуы, дини етәкселәрҙең аҡыллы эшмәкәрлегенә аныҡ дәлил. Кисә Өфөлә уҙғарылған ҙур сарала — Башҡортостан мосолмандары Диниә назаратының VII съезында — ошо йәһәттән башҡарылған һәм үтәлергә тейешле мәсьәләләр билдәләнде, ойошманың кадрҙар системаһы ҡаралды.
Йыйылышты асып, Башҡортостан Президенты Хакимиәте етәксеһе урынбаҫары Марат Мәрҙәнов республика башлығы Рөстәм Хәмитовтың съезда ҡатнашыусыларға ҡотлау хатын уҡып ишеттерҙе, Диниә назаратының Исламдың күркәм тәрбиәһен таратыуға, йәмғиәттең рухи нигеҙен, әҙәп-әхлаҡ ҡанундарын һаҡлауға һәм үҫтереүгә индергән өлөшөн юғары баһаланы. Рәсәйҙең Мөфтөйҙәр советы рәйесе Рауил хәҙрәт Ғәйнетдинов та, был һүҙҙәрҙе ҡеүәтләп, ойошманың артабан да үҙ юлын лайыҡлы дауам итеренә ышаныс белдерҙе.
— Уңышлы эшмәкәрлеккә күп йыллыҡ тәжрибәгә эйә, халыҡтың ышанысын аҡлаған хөрмәтле мөфтөй Нурмөхәмәт хәҙрәт Ниғмәтуллиндың индергән өлөшө баһалап бөткөһөҙ, — тине ул.
Башҡортостан Президенты ҡарамағындағы Дәүләт һәм конфессия-ара мөнәсәбәттәр буйынса совет рәйесе Вячеслав Пятков, Башҡортостан митрополияһы башлығы митрополит Никон, баш раввин Дан Кричевский һәм башҡалар ҙа Диниә назаратының, уға оҙаҡ йылдар етәкселек иткән мөфтөйҙөң эшен уңышлы тип баһаланы һәм киләсәктә лә милләттәр, ил мәнфәғәтендә берҙәм эшләргә теләк белдерҙе.
Һөҙөмтәлә Нурмөхәмәт хәҙрәт Ниғмәтуллин үҙ вазифаһын дауам итәсәк: съезда ҡатнашҡан 165 делегаттың 136-һы уның өсөн тауыш биреп, мөфтөйгә ҙур ышаныс күрһәтте, яңы бурыстар йөкмәтте.

Мөхәммәт хәҙрәт ТАЖЕТДИНОВ, Рәсәй мосолмандарының Үҙәк диниә назараты хакимиәте етәксеһе:
— Башҡортостан Диниә назаратының уңыштары, ҡаҙаныштары өсөн һөйөнәбеҙ, йәмғиәтебеҙ, халҡыбыҙ мәнфәғәтендә алып барған эштәрен юғары баһалайбыҙ. Йәштәр бүлеге айырыуса һөҙөмтәле хеҙмәт күрһәтә. Ғөмүмән, уртаҡ маҡсатҡа ынтылабыҙ икән, кәңәшләшеп, фекер алышып эшләргә бурыслыбыҙ. Иншаллаһ, изге ниәттәребеҙ тормошҡа ашмай ҡалмаҫ, татлы емештәре менән ҡыуандырыр.

Әғләметдин хәҙрәт ҒӘЗИЗОВ, Сибай ҡалаһының имам-мөхтәсибе:
— Нурмөхәмәт хәҙрәт Ниғмәтуллин — тәжрибәле, халыҡтың ышанысын аҡлаған етәксе. Уның үҙ вазифаһында эшен дауам итеүе, һис шикһеҙ, төбәгебеҙҙең именлеге өсөн ифрат әһәмиәтле. Шул уҡ ваҡытта дини тәрбиә биреү йәһәтенән башҡараһы бурыс бихисап: бында хөрмәтле мөфтөйҙөң тәжрибәһенә ихтыяж ҙур.