Алтын көҙҙә алтын юбилейын билдәләне Миңзәлә Хәлилова. Үткән ғүмеренең сирек быуаттан ашыуы йәмле Асылыкүл буйҙары менән бәйле.
Беҙҙең халыҡта кейәүгә сыҡҡан ҡыҙға, килен булып төшкән ереңә таш булып бат, тиҙәр. Ныҡлап төпләнде Миңзәлә, тамыр йәйҙе һәм гөрләп йәшәп китте. Ул сығышы менән Баймаҡ районының Ирәндек ҡуйынына һыйынып ултырған Байыш ауылынан. Ауылда һигеҙ йыллыҡ белем усағын тамамлағандан һуң, Сибай мәктәп-интернатында уҡый. БДУ-ны тамамлап, Дәүләкән районының Ҡоръятмаҫ урта мәктәбендә урыҫ теле һәм әҙәбиәтенән уҡыта башлай. Эшен яратып, ысын күңелдән башҡара Миңзәлә. Ошонда уҡ башҡорт теле һәм әҙәбиәте дәрестәрен алып барыу эше лә йөкмәтелә йәш белгескә. Шиғри күңелле уҡытыусы балаларҙа тыуған яҡҡа, уның тәбиғәтенә, ер кешеләренә һөйөү тәрбиәләй. Үҙе лә бәләкәй сағынан республика матбуғатында йыш күренгән Миңзәлә “Илһам” шиғри түңәрәген ойоштороп, уҡыусыларының шиғырҙарын бер йыйынтыҡҡа индереүгә өлгәшә. Мәктәптә, ауылда бер сара ла уның ҡатнашлығынан тыш үтмәй – сценарий авторы ла, ойоштороусы ла, алып барыусы ла ул. “Сәхнә оҫталығы” түңәрәген ойоштороп, уҡытыусы тәрбиәләнеүселәрен сәхнә серҙәренә өйрәтә, халҡыбыҙҙың бай мәҙәниәте менән таныштырып тора.
Башҡортостандың халыҡ яҙыусыһы Әхиәр Хәкимовтың йорт-музейы ҡарамағында эшләп килгән “Дим” ижади берекмәһенең әүҙем ағзаһы ул беҙҙең Миңзәлә. Бөгөн берекмәнең өс шиғри йыйынтығына ингән уның шиғырҙары. Дәүләкән типографияһында “Аҡ елкән” исемле айырым китабы ла донъя күрҙе.
Үҙегеҙ беләһегеҙ ауыл ерендә эштең күплеген: шәхси хужалыҡ, мал-тыуар, ҡош-ҡорт тулы ихата, мәктәптәге уҡытыу-тәрбиә эштәре, балалар бағыу... Баһадирҙай ике улдың әсәһе ул Миңзәлә. Ҡайҙан ғына өлгөрә лә, нисек бөтәһенә лә ваҡыт таба икән тип хайран ҡалам, уға ҡарап. Һәр ваҡыт хәрәкәттә, ашыға, йүгерә, барыһына ла өлгөрөргә тырыша. Йәшлек дәрте, илһам тулы күңеле уны ижади үрҙәргә лә әйҙәй. Район үҙәгендә үткән сараларҙан да ситтә ҡалмай. Үҙе яҙған сценарийҙар буйынса концерттар ойоштороп, призлы урындар алып ҡайта ул етәкләгән коллектив. Миңзәлә Хәлилованың шуға бүләктәре лә етерлек – “Рәхмәтлемен һиңә, әсәй!” ижади конкурсының “Иң яҡшы шиғыр” номинацияһы, Әлшәй районында үткән “Сәсәндәр, килегеҙ!” төбәк-ара конкурсы дипломдарына лайыҡ. Үҙешмәкәрҙәр конкурсында әүҙем ҡатнашҡан, балаларҙы район смотрына яҡшы әҙерләгән, район олимпиадаһына призерҙар тәрбиәләгән башҡорт теле һәм әҙәбиәте буйынса “Йыл уҡытыусыһы-2013” конкурсында еңеүсе лә, “Аҡмулла нәсихәттәре” республика фольклор байрамындағы сәсәндәр бәйгеһендә диплом менән бүләкләнеүсе лә ул.
Иң ҡыуандырғаны шул: быйыл Миңзәлә Бәләбәйҙән “Илһам шишмәләре” төбәк-ара конкурсында I дәрәжә дипломға лайыҡ булып ҡайтты. “Башҡортостан” дәүләт телерадиокомпанияһы ойошторған “Көндәлек” тапшырыуында ла иң юғары һөҙөмтә — уныҡы! “Әйләнә орсоҡ, әйләнә” район конкурсының “Ҡул эше серҙәрен – йәш быуынға” номинацияһында еңеүсе лә беҙҙең Миңзәлә. Уңдыҡ килендән: гөрләтеп донъя көтә, балаларҙы уҡыта, улдарына ныҡлы терәк.
Тормош иптәше Вәрис тә – бик ихлас кеше. Татыу тормош ҡорған улар. Ике улдарының да матур итеп туйҙарын үткәреп, бөгөн инде өс ейән-ейәнсәргә олатай-өләсәй булып, ҡыуанып йәшәйҙәр. Ә тормоштоң бар асылы, матурлығы ла тап шунда бит инде аңлаған кеше өсөн...
Миңзәләнең “Аҡ елкән” китабын уҡып сыҡһаң, бөтә тормош юлы күҙ алдына баҫа. Төрлө хистәр уята был йыйынтыҡ. Уйландыра ла, һағышландыра ла шиғырҙары. Уларҙа кешеләр араһындағы яҡты мөнәсәбәттәргә дан йырлау, татыу тормошҡа өндәү, Асылыкүл буйҙарының хозурлығына һоҡланыу, һәр миҙгелдең матурлығын күрә белеү, килен булып төшкән ерен яратыу ярылып ята. Ире Вәрискә, улдарына арнап яҙылған шиғырҙары бөтмәҫ һөйөү хистәре, оло ихтирам, ҡурсалау менән һуғарылған! Төшкән еренә тамыр йәйеп, ошо яҡтың кешеләрен дә үҙ итеп йәшәй белгән, бәхетен үҙе ҡойған ҡатынға ҡарап нисек итеп “алыҫтан төшкән яҡын килен” тип әйтмәйһең инде!