Башҡортостан Президенты Рөстәм Хәмитов фән һәм техника өлкәһендәге 2013 йылғы республика дәүләт премияларын тапшырыу тураһындағы Указға ҡул ҡуйҙы.
Уға ярашлы, техник фәндәр докторы, профессор, Нефтте химик эшкәртеү институтының баш технологы Теләшев Ғүмәр Ғариф улына, техник фәндәр докторы, профессор, Башҡортостан Фәндәр академияһының ағза-корреспонденты, Өфө дәүләт нефть техник университетының кафедра мөдире Әхмәтов Арыҫлан Фәрит улына, техник фәндәр докторы, Өфө дәүләт нефть техник университетының кафедра профессоры Сидоров Георгий Маркеловичҡа — “Экологик үҙенсәлектәре яҡшыртылған автомобиль бензинын алыу технологияһы” эше өсөн; медицина фәндәре докторы, профессор, Башҡортостан Фәндәр академияһының ағза-корреспонденты, Башҡорт дәүләт медицина университетының кафедра мөдире Плечев Владимир Вячеславовичҡа, медицина фәндәре докторы, профессор, Башҡортостан Фәндәр академияһының мөхбир ағзаһы Ғатауллин Наил Ғайнат улына, медицина фәндәре докторы, Башҡорт дәүләт медицина университетының Дипломдан һуң белем биреү институтындағы кафедра профессоры Хунафин Һәүбән Нурлығаян улына — “Башҡортостан Республикаһында ҡорһаҡ ярыһының йәбешеү сирен диагностикалау, дауалау, иҫкәртеү алымдарын эшләү һәм ғәмәлгә индереү” хеҙмәте өсөн; ауыл хужалығы фәндәре докторы, профессор, Рәсәй ауыл хужалығы фәндәре академияһының мөхбир ағзаһы Зыкин Владимир Александровичҡа, ауыл хужалығы фәндәре докторы, профессор, Башҡортостан Фәндәр академияһының ағза-корреспонденты, Башҡорт дәүләт аграр университетының кафедра мөдире Исмәғилев Рафаэль Ришат улына, ауыл хужалығы фәндәре кандидаты, Башҡорт дәүләт аграр университетының кафедра доценты Кадиков Рәлиф Кәшбелғаян улына, пенсионер Зыкина Людмила Яковлевнаға “Ҡиммәтле Салауат Юлаев, Ватан сорттары һәм яҙғы бойҙайҙан икмәк бешереү игене етештереү технологияһы” эше өсөн премия һәм лауреат исемдәре бирелде.