Ниндәй тулы донъябыҙ бушап ҡалды — Марат Баязит улы Ишемғоловтың арабыҙҙан кинәт китеп барыуы аңыбыҙға һыймай. Тыуған еренең патриоты, район тотороҡлолоғон, быуындар күсәгилешлелеген һәм сәйәсәтен һаҡлай алыуы менән күптәргә өлгө етәксе, шиғри күңелле, йор һүҙле, кешелекле шәхес булып күңелдә ҡалыр ул.
Ысын мәғәнәһендә матбуғат дуҫы, әҙәбиәт һәм шиғриәткә мөкиббән ғашиҡ йән тип тә беләбеҙ уны. Хеҙмәт юлының төрлө баҫҡыстарын үтеп, Ер йөҙөндәге иң гуманлы профессия — уҡытыусы һөнәрен алған, мәктәп директоры булып эшләгән кешенең мәҙәнилеге, киң эрудицияһы, мөғәмәлә итеү оҫталығы, үҙ өҫтөндә ныҡышмалы эшләүе районды етәкләүендә лә яҡшы сағылды.
Гәзитебеҙҙә “Район башлығының бер көнө” тигән яңы рубриканы асҡас, уның тәү геройҙары рәтендә тап Марат Баязит улын күрергә теләүебеҙ һис тә юҡҡа түгел ине. Һәр изге башланғысты хуплап, һис ауырһынмай күтәреп алыуына, ихласлығына иҫәп тотҡайныҡ һәм яңылышманыҡ. Халҡының көнитмеше менән ҡыҙыҡһынған, тормош сифатын күтәреү өсөн янып-көйгән, етәкселек итеү стилен камиллаштырыуҙың көн ҡаҙағында торған бурыс икәнен яҡшы аңлап эш иткән етәксенең: “Аҡсабыҙ булмағанға күрә башты эшләтергә тура килә” тигән ҡанатлы һүҙҙәре күптәр өсөн йәшәү девизы була алыр ине. Ғөмүмән, Марат Баязит улына һүҙ тапҡырлығы, фекер тослоғо, кинәйәләү бик тә хас булды. Физик-математик, иҡтисадсы һөнәрҙәренә эйә шәхестең хистәр тулышыуҙан шиғриәткә тартылыуы, шиғыр яҙыуы ла сер түгел. Халыҡтың рухи донъяһын байытыуға миҫалды күпләп килтерергә булыр ине.
“Ер — беҙҙең халыҡ өсөн үтә ҡиммәтле төшөнсә. Тик беҙ уны һабантуйҙан ҡайтҡанда, уңыш алғанда йәки һалым түләгәндә генә түгел, көн дә иҫкә төшөрөргә, ҡәҙер итергә тейешбеҙ”. “Көтөүлек итәһеңме, сәсеүлекме — һинең эшең, бары ер һиңә дәғүә белдермәһен! “Йәнле ауыл” социаль проектына икеләнеүҙәрҙе еңеп килдек тә инде”. “Ниндәй генә ҙур программалар, социаль проекттар ҡабул итмәйек, әгәр уртаһында кеше мәнфәғәте тормаһа, уларҙы үтәүҙән файҙа булмаҫ...”
Бына шулай уйлап йәшәне тынғыһыҙ Марат Ишемғолов. Үкенес, әллә күпме яңы уй-ниәте, изге эштәре бойомға ашмай ҡалды. Киләһе йылда танылған шағир Рәшит Назаровтың 70 йыллығын юғары кимәлдә үткәреү хыялы ла, районды “кирбестең баш ҡалаһы”на әүерелдереү уйы ла, “Йәнле ауыл” проектын хужаларса дауам итеү теләге лә...
...Төрөмбәткә яҡынлашҡанда район башлығынан: “Ауыл ҡапҡаһынан ингәндә шағирҙың ниндәй шиғри юлдары ҡаршылауын теләр инегеҙ?” — тип һорауыбыҙға Марат Баязит улы һис тә уйлап тормай шулай тип яуапланы:
— Һис һүҙһеҙ “Йөрәк”те!
Йыртып астым күкрәгемде,
Йолҡоп алдым йөрәгемде
Һәм, йомарлап устарыма,
Илттем уны дуҫтарыма.
Уның шиғырҙы нисек дәртләнеп, тулҡынланып аҙағынаса уҡыуын хәтерҙән юйырлыҡ түгел. Хәтирәләрҙән күңел тулыша, күҙ йәштәре ирекһеҙләй. Ниндәй оло юғалтыу кисерҙек беҙ!