Беҙ барғанда баҫыуҙа шәкәр сөгөлдөрөн йыйыу эше гөрләй ине. Ни тиһәң дә, өҫтәлдәге муллыҡ яҙлы-көҙлө һалынған тырышлыҡҡа туранан-тура бәйле бит. Быны Благовар халҡы ла яҡшы төшөнә, шуға һис тә һынатырға теләмәй.

"Разгуляй" төркөмөнә ингән "Башкир-агроинвест" яуаплылығы сикләнгән йәмғиәтенең район бүлексәһенең һөрөнтө ерҙәре 19 мең гектар майҙанды биләй. Уның етәксеһе Ришат Ғайсин һөйләүенсә, быйыл шәкәр сөгөлдөрө дүрт мең гектар майҙанда сәселгән. Уңыш ҡыуандыра: гектарынан яҡынса 500 центнерға ҡәҙәр барып баҫа. "Заманса агротехнологияларҙы ҡулланып, яҡшы минераль ашламалар индергәйнек – был шуның һөҙөмтәһе", – ти етәксе.
Хужалыҡта сөгөлдөр сығарыуға август аҙағында уҡ төшкәндәр. "Холмер" маркалы ике комбайндары бар, шулай ҙа тағы икәүҙе ситтән – Ставрополь крайынан килтерәләр. Һауа торошо яҡшы торғанда бер комбайн сменаға уртаса 15-20 гектар майҙандағы уңышты йыя. Ләкин техника етешмәүе барыбер үҙен һиҙҙертә, мәҫәлән, шәкәр сөгөлдөрөн баҫыуҙан сығарыуға йөк машиналарының аҙ булыуы ла бәкәлгә һуға.
Баҫыуҙа хеҙмәтсәндәр өсөн көнөнә өс тапҡыр аш-һыу әҙерләнә. Эш бында ике сменала ойошторолған, хеҙмәт хаҡы килешеү нигеҙендә түләнә. Яғыулыҡҡа ҡытлыҡ юҡ.
Хужалыҡтың Санны һөтсөлөк фермаһы "500 ферма" программаһына ингән, бүленгән аҡсаға бында төҙөкләндереү эштәре башҡарылған. Киләсәккә маҡсаттар ҙа елле генә: 2014 йылда инвестициялар йәлеп итеп, һөт үткәргестәр, заманса һыуытҡыстар урынлаштырырға йыйыналар. Әле бөтә көс ҡышҡа әҙерлеккә йүнәлтелгән.
Мал тоҡомон яңыртыуҙы ла маҡсат итеп ҡуйғандар, әле нигеҙҙә ҡара-сыбар тоҡомло һыйырҙарға өҫтөнлөк бирелә. Силос һала башлағандар, етәксе һөйләүенсә, быйыл мал аҙығына ҡытлыҡ булмаясаҡ. Хужалыҡта халыҡтың пай ерҙәрен дә файҙаланалар, бынан бөтәһе лә ота – хужаларға ер биләмәһе өсөн тос ҡына хаҡ түләнә. Мал йә мал аҙығы, ашлыҡ менән иҫәпләшеү мөмкинлеге лә бар.
Әммә хәл итеүҙе көткән мәсьәләләр ҙә юҡ түгел. Шуның бигерәк тә үҙәккә үткәне – кадрҙар етешмәүе. Бөгөн хужалыҡта ете ауылдан 130 кеше эш урыны тапҡан. Әммә хаҡлы ялға сығыусылар ҙа бихисап, ошо арҡала эшсе ҡулдарға ҡытлыҡ тыуа ла инде. Ауыл ере өсөн хеҙмәт хаҡы бында ҡәнәғәтләнерлек – айына 14–15 мең һум самаһы. "Ер эшен үҙ иткәндәргә, тырыштарға өҫтөнлөк бирәбеҙ", – ти Ришат Хәлит улы. Ундайҙар бөгөн дә бар, әлбиттә. Мәҫәлән, хужалыҡта өсөнсө йыл эшләгән комбайнсы Александр Быль. "Башҡарған эшемдән дә, түләнгән хеҙмәт хаҡынан да ҡәнәғәтмен", – тине ул беҙгә. Петр Небыт иһә бында 2003 йылдан тир түгә.
Һауынсы Рәмилә Метлова бөгөн дүрт тиҫтәнән ашыу һыйыр һауа. Уның шәхси ихатаһында ла ҡош-ҡорт, мал-тыуар тулып йөрөй, егәрле ҡатын йәшелсә-емешкә бай баҡса үҫтерергә лә ваҡыт таба. Улы Руслан үҙаллы тормошҡа аяҡ баҫҡан, ҡыҙы Гөлнара Башҡорт дәүләт аграр университетында белем ала икән. Рәмилә ханым хужалыҡ етәкселегенән ҡәнәғәт.
— Ниндәй генә үтенес менән мөрәжәғәт итмә, һәр ваҡыт асыҡ йөҙ менән ҡаршы алалар, һорауыңды хәл итергә тырышалар. Көҙөн бесән һәм һалам бирәләр, шәхси хужалыҡта мал тотҡас, был бигерәк тә уңайлы, – ти ул.
Шикләнәһе юҡ, тап ошондай эшһөйәрҙәр республикабыҙ уңышын тосораҡ итеүгә бөгөн бөтә көсөн һала ла инде.