Мәғариф министрлығы уҡыусылар өсөн берҙәм форма тураһында мәғлүмәтте кире ҡаҡты
Ата-әсәләрҙең һәм уҡыусыларҙың фекерен иҫәпкә алып, белем усаҡтары форманың төҫөнә һәм фасонына талаптар ҡуйырға мөмкин, тип белдерҙеләр ведомствола.
«Рәсәйҙең Мәғариф министрлығы 2025 йылдың 1 сентябренән берҙәм мәктәп формаһын индерергә йыйынмай. Росстандарттың 2024 йылдың 31 авгусындағы 1155-се бойороғо менән етештереүселәр өсөн милли стандарттың дөйөм техник талаптары билдәләнде. Улар яңы уҡыу йылынан үҙ көсөнә инә. Стандартта Гост талаптарына ярашлы мәктәп формаһын тегеү өсөн параметрҙар яҙылған», — тиелә илдең Мәғариф министрлығы аңлатмаһында.
Бынан алдараҡ ҡайһы бер киң мәғлүмәт сараларында 1 сентябрҙән берҙәм мәктәп формаһын индереү тураһында мәғлүмәт баҫылып сыҡҡайны.
Хәтерегеҙгә төшөрәбеҙ, яңы уҡыу йылында Башҡортостанда мәктәптәрҙә һәм балалар баҡсаларында медицина ярҙамы күрһәтеү стандарттары үҙгәртелә.