Республика парламенты депутаттары газондарҙа, сәскәлектәрҙә, балалар һәм спорт майҙансыҡтарында автомобилдәрен ҡалдырып киткән һәм улар аша үткәндәргә яуаплылыҡты арттырырға йыйына. Был туралағы закон проекты 28 мартта үтәсәк пленар ултырышта ҡараласаҡ.
– Газондағы парковка проблемаһы тәүге йыл ғына тикшерелмәй. Был етешһеҙлек халыҡтың да, власть органдарының да бик йәненә тейә, – тине Башҡортостан Дәүләт Йыйылышы – Ҡоролтай Рәйесе Константин Толкачев. – Ҡыҙғанысҡа ҡаршы, быға тиклем ғәмәлдә булған закондар ундай кешеләрҙе һөҙөмтәле язаға тарттыра алманы. Штрафтар судта ҡаралып кире ҡағылды, ғәйеплеләр язанан ҡасты. Проблема шунда – федераль ҡануниәттә лә, республиканыҡында ла газон мәғәнәһе нығытылмағайны. Хәҙер беҙ был темаға нөктә ҡуясаҡбыҙ. Барыһы ла еренә еткереләсәк.
Штрафтар түбәндәгесә буласаҡ: граждандар өсөн бер меңдән ике меңгәсә, вәкәләтле кешеләр өсөн 5 меңдән 10 меңгәсә, ойошмалар өсөн 20 мең һумдан 30 меңгәсә. Ҡабатлап закон боҙоусылар өсөн штраф артасаҡ: граждандар өсөн 3 меңдән 4 меңгәсә, вәкәләтле кешеләргә 15 меңдән 20 меңгәсә һәм ойошмалар өсөн 35 меңдән 50 мең һумғаса.