Республиканың юғары уҡыу йорттары Ҡытай Халыҡ Республикаһы менән әүҙем эшмәкәрлек алып бара. Башҡортостан Башлығы Рөстәм Хәмитов Ҡытайҙың алдынғы киң мәғлүмәт саралары – “Синьхуа” мәғлүмәт агентлығы һәм Ҡытайҙың Үҙәк телевидениеһы вәкилдәренә биргән интервьюһында ошо хаҡта һөйләне.

Ғәмәлдә һүҙ Башҡорт дәүләт университеты тураһында бара. Вузда Рәсәй-Ҡытай бизнес-инкубаторы булдырылған. Унда студенттар Ҡытайҙың бизнес төҙөү буйынса алымдарын өйрәнә, ҠХР-ҙа стажировкалар үтә. Башҡорт дәүләт медицина университеты Ҡытайҙың медицина өлкәһендәге ғилми даирәләре менән әүҙем эш алып бара.
Башҡортостан Башлығы шулай уҡ йәштәрҙә ҡытай теленә ҡарата ҡыҙыҡһыныуҙың артыуын билдәләне.
— Донъя иҡтисады Ҡытайға бәйле, шуға күрә ҡытай телен белмәй тороп, уңышҡа өлгәшеп булмаясағын хәҙерге заман кешеһе аңлай башланы, — тине Рөстәм Хәмитов.
“Волга – Янцзы” программаһы нигеҙендә һөйләшеүҙәр иҡтисад, сәнәғәт, инвестицияларҙы үҫтереү йүнәлешендә генә алып барылмай, тип билдәләне төбәк етәксеһе.
Шулай уҡ гуманитар өлкәлә лә хеҙмәттәшлек өйрәнелә, ул йүнәлеш тә Башҡортостан өсөн мөһим булып тора.