Тиҙләтелгән үҫеш программаһына индерелгән Күмертау ҡалаһы бөгөн икенсе йәшлеген кисерә. Бында төҙөлөш гөрләй, инвестициялар йәлеп ителә, халыҡҡа өҫтәмә эш урындары булдырыла.

Күмертауҙағы был мөһабәт бина әллә ҡайҙан күренеп тора. Ул – Боҙ аренаһы. Объект “Башҡор­тостандың йөҙ йыллығына – йөҙ объект” республика программа­һына ярашлы төҙөлә.
2015 йылда тәүге нигеҙ ташы һалынған буласаҡ спорт һарайы быйыл ноябрь айында асылып, хоккейсыларға көтөп алынған ҙур бүләк булыр тип көтөлә. Комплекста 600 урынлыҡ трибуна урынлаштырылған, VIP-ложа, алты кейем алмаштырыу бүлмәһе бар.
Заман шарттарына яраҡлаш­тырылып төҙөлгән боҙ аренаһының эш башлар минуттарын барлыҡ ҡала халҡы түҙемһеҙләнеп көтә. Ҡайһы берҙәре килеп ҡарап, танышып та китә. Бында спорт менән шөғөлләнеү өсөн барлыҡ уңайлыҡтар булдырылған. Арена­ның дөйөм хаҡы 314 миллион һум тәшкил итә, ул Социаль программалар фонды аша финанслана.
Ҡала хакимиәте башлығы Борис Беляев әйтеүенсә, хоккей майҙан­сығы Милли хоккей лигаһы стандарты буйынса төҙөлгән. Аренаға әле трибунаны, тренажер залдарында ҡорамалдар, акустика системаһы, электрон табло урынлаштыраһы ҡалған.
– Беҙҙең ҡала халҡы хоккейҙы ярата, бында республика чемпионаттарын, башҡа турнирҙарҙы үткәрергә мөмкин, – ти Борис Беляев.

Күмертау ҡалаһы.