Башҡортостан Республикаһы Үҙәк һайлау комиссияһы рәйесе Хәйҙәр Вәлиев эш сәфәре менән Сибай ҡалаһында булды. Ул ҡала территориаль һайлау комиссияһы ағзалары, Сибай ҡалаһы хакимиәте башлығы Рөстәм Афзалов, урындағы үҙидара органдары вәкилдәре, журналистар менән осрашты.

Хәйҙәр Арыҫлан улы алдағы һайлау кампанияһының үҙенсә­лектәре тураһында һөйләне, “Мобиль һайлаусы” тауыш биреү системаһына айырым иғтибар бирҙе.
— Һайлау һөҙөмтәһе берәүҙә лә шик тыуҙырмаҫҡа тейеш, — тине комиссия рәйесе. — Күп йәһәттән был һайлау комиссиялары ағзаларының профессио­нал­легенә бәйле. Һайлауҙы ғәҙел, асыҡтан-асыҡ үткәреүгә өлгәшеү мөһим. Һайлаусы иһә үҙ тауышының иҫәпкә алына­сағына ышанырға тейеш. Һәр бер етешһеҙлекте йылдам тик­шерәбеҙ. Һайлауҙы ойоштороу­сылар алдында торған тағы ла бер мөһим бурыс — халыҡҡа һайлауҙың нисек ойошторолоуы, кемде һайлауыбыҙ тураһында тулы мәғлүмәт еткереү. Был йәһәттән киң мәғлүмәт саралары ҙур ярҙам күрһәтә. Бынан тыш асыҡ агитация, һайлаусылар ме­нән аралашыу өсөн “тура элемтә” кеүек алымдарҙы ҡулла­набыҙ. Әйткәндәй, республика Үҙәк һайлау комиссияһында 2 июлдән һайлауҙа ҡатна­шыусылар өсөн “ҡыҙыу элемтә” эшләй. Бынан тыш, тауыш биреү биналарында шарттар тыуҙырыла, хәүефһеҙ­лек тәьмин ителә. Шул уҡ ваҡытта халыҡтың әүҙемлеге һайлауҙы ойоштороусыларға ғына түгел, кандидаттарға ла, уларҙың агитация эшен нисек алып барыуына ла бәйле. Быны аңларға кәрәк.