Ошо көндәрҙә Өфөнөң Рәсәй урамындағы 108-се йортта яңы форматтағы почта бүлексәһе асылды.

Нимәһе менән үҙенсәлекле һуң ул? Яңы биҙәлеше, заманса ҡора­малдары менән айырылып тора. Клиент залының майҙаны 100 квадрат метр самаһы. Электрон сират бар. Бланктар тултырыу, корреспонденцияны ҡарап сығыу өсөн уңайлы кәнәфиҙәр, өҫтәлдәр ҡуйылған. Хәрәкәт итеү мөмкинлеге сик­лән­гәндәр өсөн ҡулайламалар бул­дырылған. Ошонда уҡ банкомат, ҡәһүә һатыу автоматы эшләй.
Операциялар залында дүрт тәҙрәнән хеҙмәтләндерәләр. Ваҡытлы матбуғат, филателия, открыткалар һатыу өсөн айырым урын бүленгән. Бер тәҙрәнән банк клиенттарына хеҙмәт күрһәтәләр. Әйткәндәй, почта персоналы заманса хеҙмәт күрһәтеү буйынса белемен камиллаштырған.