Башҡортостанда тәүге тапҡыр “РобоҺабантуй” республика робот техникаһы фестивале ойошторола. Теләге булғандарҙы 9-10 июндә Бөрйән районындағы “Шүлгәнташ” ҡурсаулығында көтәләр. Сараны ойошторған “Тимер батыр” студияһы роботтар ҡатнашлығында мауыҡтырғыс программа төҙөгән.

9 июндә ҡатнашыусыларҙы урынлаштырыу, Шүлгәнташ мәмерйәһенә түләүһеҙ экскурсия ойоштороу, “Тимер батыр” кубогына роботтар футболы һәм күңел асыу программаһы күҙаллана.
10 июндә иһә “РобоҺабантуй”ҙы асыу тантанаһы була. Ярыш программаһына роботтарҙың көрәше, тоҡ менән һуғышыуы, көршәк ватыуы, арҡан тартыуы, бағанаға менеүе, таш атыуы инә. Шулай уҡ “Роботтар – ҡурсаулыҡ һағында” тигән темаға ижади проекттар конкурсы уҙғарыла. Еңеүселәрҙе ҡиммәтле бүләктәр көтә.
Роботтарға талап: 25х25 сантиметр ҙурлығындағы төрлө конструкторҙар. Шул уҡ ваҡытта бер робот бер нисә ярышта ҡатнаша ала.