Бөйөк Ватан һуғышында Еңеү көнө алдынан Башҡортостан музейҙарында 112-се (16-сы гвардия) Башҡорт кавалерия дивизияһының легендар командиры, генерал-майор Миңлеғәле Минһаж улы Шайморатов хаҡында фильмдар күрһәтелә. Комдив хаҡындағы тәүге телефильм быйыл апрелдә “Армия легендалары” документаль циклы нигеҙендә “Звезда” телеканалында сыҡҡайны. Унда генерал Шайморатовтың ябай булмаған яҙмышы, Донбассты азат иткәндә фажиғәле һәләк булыуы, 112-се кавалерия дивизияһының хәрби юлы һүрәтләнә.
Берҙәм кинолекторий музейҙарҙа 8 майҙа уҙғарыла. Шайморатов тураһындағы фильм барышында музей хеҙмәткәрҙәре ҡайһы бер хәл-ваҡиғаларға аңлатма бирәсәк.
Сараны Башҡортостандың Милли музейы ойоштора. Мәҙәни-белем биреү акцияһы уҡыусыларға, студенттарға иҫәпләнә. Уның маҡсаты — балаларҙа, үҫмерҙәрҙә һәм йәштәрҙә илһөйәрлек тәрбиәләү, музейҙарҙы берләштереү, мәҙәни-ағартыу эшенең сифатын яҡшыртыу. Унда корпоратив, ведомство, шәхси, шулай уҡ клуб-күңел асыу һәм китапхана учреждениелары ҡарамағына ингән музейҙар, күп функциялы ауыл клубтары саҡырыла.