Башҡортостанда Татарстан башҡорттары мәҙәниәте көндәре уҙҙы. Татарстан делегацияһы “Рәсәй Федерацияһы төбәктәрендә башҡорттар: тарих, хәҙерге заман” тигән “түңәрәк өҫтәл” эшендә ҡатнашты, баш ҡалабыҙҙағы Милли музейҙа, Бал йортонда, Рәми Ғарипов исемендәге 1-се башҡорт республика гимназия-интернатында, Салауат Юлаев майҙанында булды, милли батырыбыҙ һәйкәленә сәскә һалды.


Кис Өфөләге М. Ғафури исемендәге Башҡорт дәүләт академия драма театры сәхнәһендә гала-концерт булды. Башҡортостандың мәҙәниәт министры Әминә Шафиҡова сараға йыйылған халыҡты төбәк Башлығы Рөстәм Хәмитов исеменән тәбрикләне, ҡунаҡтарға рәхмәт хаттары тапшырҙы.
— Проекттың мөһим бурысы – башҡорт этносына иғтибарҙы йәлеп итеү, этник мәҙәниәтте киңәйтеү, баш­ҡорттар күпләп йәшәгән Рәсәй төбәктәре менән дуҫлыҡ бәйләнештәрен нығытыу, – тине Әминә Ивний ҡыҙы.
Был көндө драма театры сәхнәһендә яңғыраған баш­ҡорт йырҙары, күрһәтелгән сағыу бейеүҙәр, халҡыбыҙҙың йолалары барыһының да күңеленә хуш килде. Татарстан Республикаһы башҡорттары ҡоролтайы советы рәйесе Ғәле Хәсәнов Ханты-Манси автономиялы округы – ЮГРА башҡорттары ҡоролтайы башҡарма комитеты рә­йе­се Рәүҙәт Ҡолманбәтовҡа символик штандарт тапшырҙы.
Ошо этномәҙәни акция нигеҙендә 2007 йылдан башлап Силәбе, Ырымбур, Ҡурған, Һамар, Һарытау, Свердловск өлкәләре һәм Пермь крайы башҡорттары мәҙә­ниәте көн­дәре даими үткәрелде. Киләһе йыл бындай сарала Ханты-Манси автономиялы округы башҡорттары ла ҡатнаша.