Сәнәғәт ҡеүәтен арттырыу маҡсатында Башҡортостанда импортты алмаштырыу буйынса өр-яңы төбәк планы төҙөлдө. Тиҙҙән ул республика Хөкүмәте ҡарауына индереләсәк, тип белдерҙе Башҡортостандың сәнәғәт һәм инновация сәйәсәте министры Алексей Карпухин.

Хөкүмәттә үткән оператив кәңәшмәлә хәбәр ителеүенсә, 2015 — 2017 йылдарға импортты алмаштырыуға ярҙам итеү буйынса республика “юл карта­һы” нигеҙендә 45 сара план­лаштырылғайны. Әле уларҙың барыһы ла тормошҡа ашырылды.
Һуңғы йылдарҙа республикала ойошторолған профилле тармаҡ кластерҙары план­дар­ҙы тормошҡа ашырыуҙа ҙур әһә­миәткә эйә булды. Улар иҫә­бенә бәләкәй тоннажлы химия, нефть һәм газ инжинирин­гы, геофизика, территориаль нефть химияһы, шулай уҡ ра­дио­электроника кластерҙары инә.
2015—2016 йылдарҙа Баш­ҡортостандағы туғыҙ предприятие Сәнәғәтте үҫтереү фонды­ның ташламалы займы рәүе­шендәге дәүләт ярҙамы сара­һынан файҙаланған. Модернизациялау, техник яҡтан ҡайта­нан йыһазландырыу һәм яңы продукция етештереүҙе яйға һалыу проекттарына 1,7 миллиард һумлыҡ займ алын­ған. Федераль фонд 508 миллион һумлыҡ тағы ла өс проектты хуплаған. Машиналар эшләү, металлургия һәм химия сәнәғәте предприятиелары ярҙам алған. Башҡортостанда Сәнәғәтте үҫтереү фонды төҙөлдө. 2017—2019 йылдарҙа төбәк ҡаҙнаһынан фондты йыл һайын 100 миллион һум күлә­мендә финанслау күҙаллана. Эксперттарҙың фекеренсә, был республика фонды йүнәлт­кән 1 һум аҡсаға кәмендә 5,67 һумлыҡ тышҡы инвестиция йә­леп итеү мөмкинлеген бирәсәк.