Күптән түгел Йәрмәкәй районының Яңы Турай ауылында II класта уҡыған ике бала тюбингта шыуырға китә. Йылға эргәһенән үткәндә малайҙарҙың береһе боҙ өҫтөнә баҫа һәм, уның ныҡлығын тикшермәксе булып, һикерә башлай.

– Көтмәгәндә боҙ ярылып, малай һыуға төшөп китә, бата башлай. Ҡыс­ҡырған тауышты ишетеп, Фәдис Сә­лим­гәрәев ярҙамға килә, баланы һыуҙан һөйрәп сығара. Бергәләп улар Фәдистең өләсәһенә юлланалар. Малайҙың кейемен алмаштырып, йылытҡан­дан һуң, ата-әсәһенә хәбәр итә­ләр, – тине Рәсәй Ғәҙәттән тыш хәл­дәр министрлығының Баш­ҡорт­остан буйынса Баш идаралы­ғының матбуғат хеҙмәткәре Елена Мәүлетова.
– Балаларҙың ғүмере өсөн хәүеф­лән­дем. Бер аҙ тыныс­лан­ғас, улым өсөн ғорурлыҡ тойғоһо биләп алды. Фәдис – өс улымдың иң кесеһе. Уның киләсәктә табип булыуын теләйбеҙ. Тик ул әлеге ваҡиғаға тик­лем үк ҡотҡарыусы һөнәрен һайларға теләй ине, – тине Гөлназ Сәлимгәрәева.
Бәләбәй ҡалаһынан һигеҙ йәш­лек батыр насар күргәндәр өсөн коррекция мәктәбендә уҡый.
– Фәдис – өлгөлө уҡыусы, дә­рестә яуап бирергә тырыша, әҫәрҙәрҙе ҡыс­ҡы­рып уҡырға ярата. Ҡушылған эште ҙур теләк менән башҡара, класс һәм мәк­тәп тормошонда әүҙем ҡатнаша. Дуҫ­тары менән ихлас аралаша, ярҙам­сыл, – тине мәктәп етәксе­леге ҡыйыу малай тураһында.
Ведомствоның матбуғат хеҙ­мә­тенән белдереүҙәренсә, Фәдис Сәлимгәрев ҡыйыулығы һәм тәүәккәллеге өсөн ми­нистр­лыҡ­тың “Һыуҙа һәләкәткә осраған­дар­ҙы ҡотҡарған өсөн” отличие билдәһе менән бүләкләүгә тәҡ­дим ителгән.