Башҡортостандың халыҡ артисы Вахит Хызыров беҙҙең дәүергә тиклем II мең йыл элекке осорға ҡараған үҙенсәлекле һауыт тапҡан. Күренекле артист үҙенең тыуған ерендә – Әбйәлил районының Таштимер ауылы янында был табышҡа көтмәгәндә юлыҡҡан.
— Балсыҡтан эшләнгән һауыт өй төҙөгән саҡта килеп сыҡты. Ул бик яҡшы хәлдә һаҡланған – был үтә нескә эш, унда арый символикаһына оҡшаған орнамент бар. Һауыт яҡын­са 8-10 литрлыҡ. Белгестәр әйтеүен­сә, ул бронза быуатҡа ҡарай, — тине йырсы.
Археологик ҡомартҡыны артист республиканың Милли музейына тапшырҙы. “Һис шикһеҙ, бронза бы­уат­ҡа ҡараған һәм һәйбәт һаҡланған һауыт “Археология” коллекцияһы­ның биҙәгенә әйләнәсәк”, – тип хәбәр итте күргәҙмәләр бүлеге мөдире Алһыу Мөфтәхова.
Музей менән тығыҙ хеҙмәттәшлек иткәне һәм төбәктең тарихи-мәҙәни ҡомартҡыларын һаҡлау эшенә ин­дер­гән шәхси өлөшө өсөн Башҡорт дәүләт филармонияһы йырсыһы Вахит Хызыровҡа тантаналы шарттарҙа Рәхмәт хаты тапшырыласаҡ.