Башҡортостан Республикаһы Дәүләт Йыйылышы – Ҡоролтай Рәйесе Константин Толкачев 2017 йылда Республика көнөнә әҙерләнеү һәм уны үткәреү буйынса ойоштороу комитетына етәкселек итә. Республика Башлығы Рөстәм Хәмитов ошо туралағы Указға ҡул ҡуйҙы.

– Республика көнө – дәүләтебеҙҙең ҙур байрамы. Ул – күп милләтле төбәгебеҙ, бында йәшәгән халыҡтар берҙәмлеге һәм татыулығы көнө, – тине Константин Толкачев. – Байрам юғары кимәлдә ойоштороласаҡ. Бөтә ҡалаларҙа һәм райондарҙа тантаналар, күмәк мәҙәни, спорт саралары үткәреләсәк, йәрминкәләр ойоштороласаҡ, май­ҙандар, биналар биҙәләсәк. Сараларҙа граждандар күпләп ҡатнашһын ине. Шул уҡ ваҡытта саманан тыш сығымдарҙан баш тартасаҡбыҙ. Бындай саралар өсөн бүленгән аҡса республика халҡыныҡы. Күптәр оҙайлы фейерверктарҙы, эстрада йондоҙ­ҙарын саҡырыуҙы аҡсаны елгә осороу тип иҫәпләй. Республикабыҙҙағы танылған ижади коллективтар ҙа сағыу итеп сығыш яһай, байрам кәйефе өҫтәй ала. Бындай саралар байрам ярҙамында аҡса эшләүселәр өсөн түгел, ә Башҡортостан халҡы өсөн үткәрелә. Киләһе аҙнала ойоштороу комитетының тәүге ултырышын үткәрергә ниәтләйбеҙ. Шунда саралар планын төҙөйәсәкбеҙ.