Пермь крайында “Күскенсе” башҡорт мәҙәниәте фестиваль-конкурсы уҙғарыла. Унда ижади коллективтар, вокалсылар, сәнғәт оҫталары йыйыла. Фестиваль 29 сентябрҙә Чернушки ҡалаһының “Нефтсе” үҙәгендә үткәрелә.

Ҡатнашыусылар ижади сығыш­тарында башҡорт халҡының үҙенсәлекле йолаларын, ғөрөф-ғәҙәттәрен, уйындарын, байрамдарын күрһәтә, мөнәжәт, бәйет, ҡобайыр башҡара ала. Бынан тыш, бәйгелә “Вокал ижады”, “Хореография ижады”, “Халыҡ музыка ҡоралдарында уйнау” кеүек номинациялар күҙаллана. Шулай уҡ “Шәжәрә”, “Милли аш-һыу”, “Халыҡ ижады әйберҙәре” конкурстары ойошторола. Концерт программаһына тиклем Баш­ҡортостандан саҡырылған тарихсылар, йәмәғәт ойошмалары һәм коллектив етәкселәре ҡат­нашлығында “түңәрәк өҫтәл” үткәрелә.
Фестивалде ойоштороусы Пермь крайы башҡорттары ҡоролтайы етәксеһе Рәсил Мөхәмәтйәнов әйтеүенсә, кон­курстың маҡсаты һәм бурысы – башҡорт халҡының мәҙәниәте, тарихы менән таныштырыу, халыҡтың ижади мөмкинлектәрен үҫтереү, фольклор һәм башҡа ижади коллективтарҙы, туған телде, үҙенсәлекле мәҙәниәтте һаҡлап ҡалыу.