“Берҙәм Рәсәй” партияһының “Уңайлы ҡала мөхите булдырыу” федераль проектын тормошҡа ашырыуға ярашлы, Белоретта күп фатирлы йорт ихаталарын төҙөкләндереү әүҙем бара.

Быйылға билдәләнгән программаға 22 ихата эләккән, шуларҙың 18-ендә ремонт эштәре тамамланған. Биләмәләрҙе яңыртыуға 32 миллион һум самаһы, шул иҫәптән ихаталарға – 21 миллион, йәмәғәт урындарына 11 миллион һум аҡса бүленгән.
– Әлегә тиклем бер тапҡыр ҙа Белоретта бындай күләмдә ихаталар төҙөкләндерелгәне булманы, – тине ҡала хакимиәте башлығы Сергей Поляков. – Бөтә эштәр халыҡтың туранан-тура ҡатнашлығында башҡарылды. Йәшелләндереү, юлдарҙы киңәйтеү мәсьәләләре хәл ителде.
Ихаталарҙы төҙөкләндереүгә ғаризалар йәмәғәт комиссияһы тарафынан бойомға ашырылды. Активистар йыйылыш үткәреп, буласаҡ ихатаның проектын раҫланы, тейешле документтарҙы йыйҙы.