Round University Ranking (RUR) агентлығы донъяның быйылғы иң яҡшы университеттары рейтингын баҫып сығарҙы. Башҡортостандан был рейтингта ике университет бар – Өфө дәүләт авиация техник университеты (дөйөм исемлектә 657-се урын, Рәсәйҙекеләр араһында – 34-се) һәм Өфө дәүләт нефть техник университеты (дөйөм исемлектә – 746-сы, Рәсәйҙекеләр араһында – 60-сы).
RUR Халыҡ-ара рейтингы Рәсәйҙә ойошторолған беренсе глобаль университеттар рейтингы булып һанала. Уға ярашлы, университеттар биш үлсәү йүнәлешенә төркөм­ләштерелгән 20 билдә буйынса баһалана:
— белем биреү сифаты (юғары уҡыу йортоноң баһаһынан 40 процент);
— тикшеренеүҙәр сифаты (40 процент);
— интернатлаштырыу кимәле (юғары уҡыу йортон баһалауҙан 10 процент);
— финанс тотороҡлоғо кимәле (10 процент).
RUR-2017 рейтингында 74 илдән бөтәһе 763 университет ҡатнашҡан. Рәсәйҙең 30 төбәгенән 67 университет тәҡдим ителгән. Тәҡдим ителгән юғары уҡыу йорттарының иҫәбе буйынса Рәсәй донъяла дүртенсе урында тора. Былтыр Рәсәйҙән 23 вуз күрһәтелгән булған.