Ил Президенты Владимир Путин Сочи ҡалаһында “Сириус” талантлы балалар мәғариф үҙәгендә белем алған ҡыҙ һәм егеттәр менән осрашып, уларҙың бихисап һорауҙарына яуап бирҙе.
Владимир Владимировичтың үҫмерҙәр менән асыҡтан-асыҡ һөйләшеүе, һәр һорауға төплө яуап биреүе оҡшаны. Мәҫәлән, берәү ил етәксеһенән мәктәптә нисек уҡыуы тураһында ҡыҙыҡһынды.
Владимир Путин 8-се кластан һуң физика һәм химия фәндәрен тәрән өйрәнеү өсөн бүтән мәктәпкә күскән. Ә һуңынан инде унда бөтөнләй бүтән предметтар өйрәнелгән университеттың юридик факультетына уҡырға ингән. Әлбиттә, тырышлыҡ һәр ерҙә лә кәрәк. Абитуриент булараҡ, ул сит телдәрҙе, шулай уҡ тарих менән әҙәбиәтте өйрәнеүгә күп ваҡыт бүлгән.
– Беренсенән, ҡайҙа уҡыуың тураһында йәһәтерәк хәл итергә кәрәк, – тине балалар менән һөйләшеү барышында ил етәксеһе. – Икенсенән, алдыңа дөрөҫ маҡсат ҡуйыуыңды аңлау зарур. Шул ваҡытта ғына барыһы ла уң киләсәк.