Ошо көндәрҙә мәғариф министры Гөлназ Шафиҡова етәкселегендәге Башҡортостандың рәсми делегацияһы Боден күле өҫтөндәге авиаһәләкәттең 15 йыллығына арналған иҫтәлекле саралар үткәреү өсөн Германия Федератив Республикаһында булды.

Бынан 15 йыл элек 1 июлдән 2-һенә ҡарай төндә диспетчер хеҙмәтенең хатаһы һөҙөмтәһендә Юберлинген ҡалаһы өҫтөндә “Башҡортостан һауа юлдары”ның “ТУ-154” самолеты менән “Боинг 757” бәрелеште. “ТУ-154” самолетында 12 экипаж ағзаһы, 57 пассажир, шул иҫәптән Испанияға ялға юлланған 52 бала һәләк булды. Уларҙың күбеһе – Башҡортостандан.
Әлеге матәм сараларында 80-гә яҡын кеше – Башҡортостан Хөкүмәте вәкилдәре, һәләк булған балаларҙың, экипаж ағзаларының ата-әсәһе, туғандары ҡатнашты.