3 июлдә “Башҡортостан” дәүләт концерт залында Йәйге осрашыуҙар асыла. Был проектты Башҡортостандың милли симфоник оркестры тәҡдим итә. Төп концерт миҙгеле тамамланғандан һуң, коллектив тамашасыларҙы яратҡан кинофильмдар музыкаһы менән ҡыуандырырға ниәтләй.
— Киномузыка күңелемә бик яҡын, — ти программа дирижеры Камил Абдуллин. — 2011 йылдан Рәсәй фильмдарына һәм сериалдарға музыка яҙам. Һөнәри белемде Заһир Исмәғилев исемендәге Өфө дәүләт сәнғәт институтында Салауат Сәлмәнов класында алдым. Санкт-Петербургта Максим Кошеваровтың студияһына эләгеү бәхете тейҙе.
Кисәлә тамашасылар ҙур экранда легендар кинотаҫмалар кадрҙарын да күрәсәк. Сара киске сәғәт 7-лә башлана.