Алдан хәбәр итеүебеҙсә, күптән түгел Дәүләт Йыйылышы – Ҡоролтай һәм республика Башлығы Рөстәм Хәми­тов БР Үҙәк һайлау комиссияһының яңы составын раҫла­ғайны. Кисә иһә ведомствоның тәүге ултырышы үтте – комиссияның рәйесе, уның урынбаҫары һәм комиссия секретары һайланды.
Комиссия ағзалары БР Үҙәк һайлау комиссияһы рәйесе вази­фаһына бер тауыштан йәнә Хәйҙәр Вәлиевте һайланы. Әйткәндәй, уның кандидатураһын Рәсәйҙең Үҙәк һайлау комиссияһы ла хуп­лағайны. Хәйҙәр Арыҫлан улы әлеге вәкәләттә биш йыл эш­лә­йәсәк. Быйыл иһә ул муниципаль һайлауҙарҙы ойоштороуҙа яр­ҙам итәсәк. Хәтерегеҙгә төшөрәбеҙ, Берҙәм һайлау көнөндә Бе­лорет, Бөрө ҡала советтарына депутаттар һайлаясаҡбыҙ. Бы­нан тыш, өҫтәмә һайлауҙар буйынса 168 һайлау кампанияһы үтәсәк.
БР Үҙәк һайлау комиссияһы рәйесе урынбаҫары вазифаһына иһә Марат Ғадилов, ә секретарь итеп йәнә Марина Долматова һайланды. Яҡын арала Үҙәк һайлау комиссияһының яңы составы 2018 йылдың мартында үтәсәк Рәсәй Президенты һайлауҙарына әҙерлек башлаясаҡ.