Башҡортостан Республикаһы Дәүләт Йыйылышы – Ҡоролтай Рәйесе Константин Толкачев эш сәфәре менән Туймазы ра­йонында булды.
Туймазы ҡалаһында республика парламенты етәксеһе “Берҙәм Рәсәй” партияһының беренсел бүлексәләре секретарҙары өсөн республиканың көнбайыш төбәге семинарында ҡатнашты. Белем алыу, тәжрибә уртаҡлашыу маҡсатында уҙғарылған сараға 200-ҙән ашыу кеше килде.
Константин Толкачев үҙ сиратында беренсел ойошмаларҙың халыҡ менән аралашыуҙағы әһәмиәтен билдәләне. “Һәр һайлаусы менән эш итеүҙә уның өмөт-теләктәрен белеү, ваҡытында уға ярҙам итеү мөһим”, – тине ул.
Семинарҙа ҡатнашыусыларҙы сәләмләгәс, “Берҙәм Рәсәй” Үҙәк һайлау комиссияһы департаментының советнигы Александр Долганов Константин Толкачевҡа Дмитрий Медведевтың ҡултамғаһы менән партияның Генераль советы ағзаһы таныҡлығын тапшырҙы.