Башҡортостан Башлығы Рөстәм Хәмитов Балтас райо­нына эш сәфәре барышында “Һабантуй-2017” халыҡ байрамында булды.
Республика етәксеһе район халҡын яҙғы баҫыу эштәре тамамланыуы менән ҡотланы, биләмәнең социаль-иҡтисади яҡтан үҫеш мәсьәләләрен тикшерҙе.
– Балтас районы игенселәренең сәсеү эштәрен беренселәрҙән булып тамамлауы минең өсөн ҡыуаныслы. Артабан да төбәгебеҙ ныҡлы аҙымдар менән алға барһын, – тине Рөстәм Хәмитов. – Республикабыҙ бөгөн бөтә йүнәлештәр буйынса ла үҙен ышаныслы тоя. Сәнәғәт етештереүе өлкәһе үҫешә. Былтырғы менән сағыштырғанда, йыл башынан һалым керемдәре ун ике процентҡа тиерлек артҡан. Яҡшы күрһәткес. Ул ресурстарҙың, аҡсаның барлығы хаҡында һөйләй, тимәк, планлаштырған эштәрҙе башҡара аласаҡбыҙ. Был социаль объекттар, юлдар, инфраструктура һәм кешеләргә кәрәкле бөтә нәмәләрҙе төҙөүгә ҡағыла.
Рөстәм Хәмитов Закирйәновтар, Солтановтар һәм Мәхмү­товтарҙың йәш ғаиләләренә торлаҡ шарттарын яҡшыртыуға сертификаттар, Иҫке Балтас ауылынан быйыл алтын туйын билдәләгән Ғәйнановтар ғаиләһенә иҫтәлекле бүләк тапшырҙы.
Байрамда шулай уҡ агросәнәғәт комплексы алдынғыларының парады, ижади коллективтарҙың сығышы, конкурстар, ат спорты ярыштары булды.