Әҙәбиәт, сәнғәт һәм архитектура өлкәһендәге Шәйехзада Бабич исемендәге йәштәр премияһына эштәр ҡабул ителә.
Уға әҙәбиәт өлкәһендәге әҫәрҙәр – матбуғатта баҫылып сыҡҡандан һуң, музыка, театр, һынлы сәнғәт, хореография, эстрада һәм цирк сәнғәте, дизайн, кино һәм телевидение өлкәһендәге әҫәрҙәр сәхнәләрҙә, күргәҙмәләрҙә, премьераларҙа, радио һәм телевидение аша халыҡҡа еткерелгәндән, архитектура өлкәһендәге объекттар файҙаланыуға тапшырылғандан һуң дәғүә итә ала.
Премия талантлы һәм әүҙем йәштәрҙең һәләтен, ижади ҡеүәтен үҫтереүгә йүнәлтелгән һәм әҙәбиәт, сәнғәт, архитектура өлкәһендәге иң яҡшы эштәр өсөн тапшырыла. Наградаға айырым шәхестәр ҙә, коллективтар ҙа өмөт итә ала. Ләкин бәйгенең шарттары буйынса, кандидаттар 35 йәштән дә өлкән булмаҫҡа тейеш. Премияның күләме – 150 000 һум.