1 июндән “Башҡортостандың яратҡан рәссамдары” конкурсы старт ала. Дәғүәселәр өсөн һәр кем онлайн режимда тауыш бирә ала. “Башинформ” агентлығында үткән матбуғат конференцияһында һүҙ ошо хаҡта барҙы.
Рәссамдарҙың ижад емештәре менән “Башҡорт­остандың яратҡан рәссамдары” сайтында танышырға мөмкин. Ошонда уҡ тауыш биреү ҙә ҡаралған. Проекттың маҡсаты – башҡорт рәссамдарының ижадын бөтә илгә популярлаштырыу. Ойоштороусылар әйтеүенсә, конкурс масштаблы булмаҡсы.
– Конкурста махсус белеме булмаған, профессионал һәм һәләтле рәссамдар ҡатнаша ала. Ижад емештәре өс номинацияла билдәләнәсәк: “Мастер” (профессионал рәссамдар), “Перфоманс”
– (неформаль йүнәлешен үҙ иткәндәр) һәм “Һәләтле рәссам” (махсус белеме булмағандар), – ти конкурстың авторы Наил Мәхмүтов.
Белеүебеҙсә, өлкән йәштәгеләр Интернет даирәһендә һай йөҙә, ҡайһы берәүҙәр уның менән хатта бөтөнләй ҡулланмай. Ойоштороусылар быны ла иҫәпкә алған. Ярҙамға студенттар йәлеп ителгән. Отряд командиры Ирина Сухарева әйтеүенсә, улар рәссамдарға эштәрен Интернетҡа ҡуйырға ярҙам итергә әҙер.
Проект алты ай дауам итәсәк. Еңеүселәр тауыштар һаны һәм эксперт советы фекере нигеҙендә билдәләнәсәк. Эштәрҙе М. Аҡ­мулла исемендәге Башҡорт дәүләт педагогия университетының художество-графика факультеты деканы Тәлғәт Мөсәлимов, З. Ис­мәғилев исемендәге Сәнғәт академия­һының художество-графика факультеты деканы Әмир Мәзитов, М. Нестеров исемендәге музей директоры Айрат Тереғолов, “Рампа” журналының баш мөхәррире Игорь Тонконогий, Башҡортостандың Рәссамдар союзы рәйесе Хәтип Фазылов, “Аҡ ҡоҙғон” клубы президенты Эльшад Теләшев баһалаясаҡ. Конкурстың аҙағында иң яҡшы 50 рәссам һайлап алынасаҡ. Улар тураһында китап баҫыу күҙаллана.
Наил Мәхмүтов әйтеүенсә, рәссамға арналған иң яҡшы комментарий, пост, мәҡәлә, клип, йыр авторҙары ла махсус бүләк менән баһаланасаҡ. Яратҡан рәссамығыҙ өсөн тауыш бирергә ашығығыҙ!