Өфөнөң “Салауат Юлаев һәйкәле алдындағы майҙанда тиҙҙән студенттарҙың “Киске уйын” тип аталған марафоны башлана.
Бөтә донъя башҡорттары ҡоролтайы Башҡарма комитетының матбуғат хеҙмәтенән хәбәр итеүҙәренсә, республика йәштәренең тәүге осрашыуы 20 майҙа үтәсәк. “Юлдаш” радиоһы алып барыусылары байрамда ҡатнашыусылар өсөн төрлө уйындар, бәйгеләр ойошторасаҡ. Башҡорт эстрадаһы йондоҙҙары ҡатнашлығында ҙур концерт көтөлә. Республикалағы йәш яҡташтар ассоциацияһы Экология һәм махсус һаҡланған тәбиғәт биләмәләре йылына арналған эко-квест үткәрергә ниәтләй.
Сара киске сәғәт 6-ла башлана. “Киске уйын”ды Бөтә донъя башҡорттары ҡоролтайы Башҡарма комитеты, “Юлдаш” радиоһы, Өфө һәм баш ҡаланың Киров районы хакимиәттәре, йәштәр эштәре буйынса ҡала комитеты ойоштора. Артабан бындай кисәләрҙе октябргә тиклем айына ике тапҡыр үткәреү күҙаллана.