Рәсәй Президенты Владимир Путин бюджет өлкәһен һәм пенсионерҙарҙы “Мир” милли түләү карталарына этаплап күсереүҙе хупланы.
Банктарға 1 июлгә тиклем бөтә ҡулайламаларҙа, шул иҫәптән банкоматтарҙа иҫәп-хисаптар өсөн ошондай карталарҙы ҡабул итеүҙе тәьмин итеү бурысын ҡуйҙы ул. Ошо көндән алып бюджет хеҙмәткәрҙәре иҫәп асыуҙы һорап мөрәжәғәт иткәндә банктар “Мир” картаһын бирергә тейеш. Милли түләү системаһына ҡара­ма­ған карталарҙы ҡулланыусылар 2020 йылдың 1 июленән дә һуң­ға ҡалмайынса иҫке карталарын “Мир”ға алмаштырырға бурыслы.
Дәүләт Башлығы ҡул ҡуйған закон шулай уҡ бәләкәй предприятиеларға 2017 йылдың 1 октябренә тиклем “Мир” карталарын ҡабул иткән терминалдар ҡуйыу бурысын йөкмәтә. Шул уҡ ваҡытта табышы йылына 40 миллион һумдан артмаған эшҡыуарлыҡ субъекттарына, Интернет селтәренә тоташмаған төбәктәрҙәге һатыусыларға бындай талап ҡағылмай.