Ошо көндәрҙә Волгоград ҡалаһында ХХV Бөтә Рәсәй фәнни-ғәмәли конференцияһы үтте. Унда Башҡортостандан ике кеше, 95-се дүрт орденлы Полтава дивизияһы яугирҙәренең улдары – һуғыш һәм хеҙмәт ветерандарының республика советы президиумы ағзаһы Энгель Зәйнетдинов һәм Башҡортостан Журналистар союзы рәйесе урынбаҫары Фәнил Ҡоҙаҡаев саҡырылды.
Өлкә губернаторы башланғысы менән уҙғарылған күләмле сараның ойоштороусылары – 95-се гвардия Полтава дивизия­һының ветерандар советы һәм Ф.Ф. Слипченко исемендәге Волгоград лицейы. “Рәсәй Федерацияһында тәрбиәне үҫтереү стратегияһы: йәштәрҙә ватансылыҡ һәм гражданлыҡ тәрбиәләүҙә Ф.Ф. Слипченко исемендәге Волгоград лицейының инновациялы тәжрибәһе” осрашыуҙың төп темаһы булды. Сара программаһына тәрбиә өлкәһендәге көнүҙәк мәсьәләләргә арналған “түңәрәк өҫ­тәл”дәр, яңы проекттар менән таныштырыу инде. Ҡунаҡтарға Ма­маев ҡурғанындағы Мемориаль комплексҡа, шулай уҡ 1942 йылда ҡаты һуғыш булған Октябрь районына сәфәр ойошторол­до. Сарала ҡатнашыусылар Верхние Кумское утарында булды, дүрт мең һалдат ерләнгән “Ҡорос ялҡын” мемориалына сәскә һалды.
– Көн һалҡын булыуға ҡарамаҫтан, осрашыу күңелдәрҙе йы­лыт­ты, – тип тәьҫораттары менән уртаҡлашты Фәнил Ҡоҙаҡаев. – Май байрамдары алдынан ошондай форумды ойоштороусыларға ҙур рәхмәт.